WUNE watha lhaghanisya neryo enyuma waho iwayisanga isiwanga thoka eriberererya lyo? Omulhume omwa kisasani eki mwakolha athya, kandi kyakilekire inyabya n’obulighe. Omulhume ni mutsweri embangi omwa Isreali oyukahulhawa mwa Yefuta.

Yefuta ali omwa buthuku Abaisraeli babya isibakiramaya Yehova. Bali mukolha ebibi kandi. Neryo Yehova akaleka abandu abe Amoni ibabanubya. Eki kikaleka Abaisraeli ibalhakira Yehova bathi: ‘Thwabiri kuhalyako. Kisi-kisi, thulhamaye!’

Abandu bakayikubaya bwomo busana n’ebindu bibi ebyo babirikolha. Bakakanganaya ngoku bamayikubya bwomo, bakathasya ramya Yehova. Neryo Yehova kandi akabawathikaya.

Abandu bakasombolha Yefuta eriyalhwa n’abandu babi ab’Amoni. Yefuta anzire kutsibu Yehova amuwathikaye omwa malhwa. Neryo amalhaghanisaya Yehova athi: ‘Wamamba erisinga ab’Amoni, omundu w’erimbere oyukendisyalhua omwa nyumba yaghe akasyanyithangirira, ngendi syakuhayo.’

Yehova akahulikirira erilhaghanisya lya Yefuta, kandi akamuwathikaya erisinga amalhwa. Yefuta akabya asuba eka wiwe, wunasi nga nindi oyukasa erimbere-mbere erisya muthangirira? Ni mwali wiwe, omwana wiwe mughuma musa. Yefuta akalhaka athi: ‘Iyoo, mwali waghe! Kawamandethera bulighe. Aliriryo nabiri lhaghanisya Yehova, kandi sinanga thoka eriyisubako.’

Mwali wa Yefuta akabya aminya okw’ilhaghanisya liwe, nayu akatsuka erikwa obulighe. Kusangwa ikyamamanyisya kithi akendi sigha thatha wiwe n’abanywani biwe. Aliriryo akendi kolesya engebe yiwe yosi akakolera omwa hema ya Yehova mwe Silo. Busana n’ekyo akabwira thatha wiwe athi: ‘Wamabya iwabiri lhaghanisya Yehova, wutholere iwa berererya lyo.’

Neryo mwali wa Yefuta akaghenda e Silo, n’eriyakolesya engebe yiwe yosi akakolera Yehova omwa hema yiwe. Ebiro bbini omwa buli kirimo abakali Abaisraeli bakaya mubalhamira, n’erisiba nayu ibane mutsemera haghuma. Abandu banzire mwali wa Yefuta kusangwa ni mukoli mubuya wa Yehova.