Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ekitabu Kyaghe Eky’Esyangano sye Biblia

 OLHUGHANO 25

Erihiika Likaya e Misiri

Erihiika Likaya e Misiri

YOZEFU syanga thasya kakirya emibere yiwe ngokw’akayowa. Akabwira abaghombe biwe abosi athi balhue omwa kisenge. Yozefu akabya abiri sighalha n’abaghalha babu iyuwene, akatsuka eririra. Thwangana lengekania ngoku baghalha babu bakasweka, kusangwa sibasi ekikaleka inyalira. Neryo erighunzerera akabugha athi: ‘Ningye Yozefu. Thatha waghe akineho?’

Baghalha babu bamasweka kutsibu, isibangathoka n’erikania. Bamakwa obuba. Aliriryo Yozefu amabugha athi: ‘Mwase hakuhi.’ Bakabya baseghera hakuhi, neryo amabugha athi: ‘Indi mughalha wenyu Yozefu, oyo mwaghulhaya e Misiri.’

Yozefu akongera inyane mubugha n’olhukeri athi: ‘Simuyiswekere kusangwa mumwanyighulya eno. Kwenene ni Nyamuhanga oyu wanyithuma e Misiri erilhamya esyangebe sy’abandu. Farao abiri nyikolha mwa muthabali w’erihanga lyosi. Neryo hathya mwanguhe eyiri thatha waghe n’erimubwira eki. Kandi mumubwire muthi ase ikale eno.’

Neryo Yozefu akawa oku baghalha babu n’erilyatsirira abosi. Farao akabya akowa indi baghalha babu Yozefu bamasa, amabwira Yozefu athi: ‘Leka baghende n’esyagali bayende thatha wabu n’amahiika wabu base eno. Ngendi baha ekithaka ekyuwene omwa Misiri Yosi.’

Ekyo kyababya bakolire. Hano wangana lhangira Yozefu akasangangana na thatha wiwe omughulhu asa e Misiri n’erihiika liwe lyosi.

Erihiika lya Yakobo lyabya iryabiribya linene. Abosi babya 70 omughulhu basuba e Misiri, eribara Yakobo n’abana biwe n’abitsikulhu. Aliriryo yanabya n’abakali, kandi obundi nibya n’abaghombe bangi. Abosi aba mubikalha e Misiri. Babya bakahulhwa mw’Abaisraeli, kusangwa Nyamuhanga abya inyabiri hindulha erina lya Yakobo mwa Israeli. Abaisraeli mubabya abandu ba Nyamuhanga ab’embaghane, ngoku thukendi lhangira embere.