Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ekitabu Kyaghe Eky’Esyangano sye Biblia

 OLHUGHANO 32

Ebihunzo 10

Ebihunzo 10

THUNGERERA ebisasani. Obuli kisasani kikakanganaya ekihunzo ekya Yehova aletha okwa Misiri. Omwa kisasani ky’erimbere wanganalhangira Haruni akaswirya Olhusi Nili omwa mutso wiwe. Abere abirikolha athya, amaghetse w’omwa lhusi mwahinduka musasi. Esiswe musya holha, n’olhusi mulhwatsuka eribeha.

Erikwamya okw’ekyo, Yehova mwaletha ebikere erilhua omwa Lhusi Nili. Mubyabya ehosi-hosi—omwa meko, esyanyungu esy’eritsumbiramu, omwa syangyingo sy’abandu—ehosi-hosi. Ebikere byabere byabiri holha, abanya Misiri mubabikuma-kumira haghuma mwa birundo-birundo, neryo ekihugho mukya beha kutsibu.

Neryo Haruni mwaswirya ekithaka omwa mutso wiwe, n’olhuthuthu mulhwahinduka mwa bukundu. Obu ni buhuka buke-buke obuka ghulhuka kandi buka katilaya. Obukundu kyakyabya kihunzo ekya kasathu omwa kihugho ekye Misiri.

Ebindi bihunzo mubya hamba okw’abanya Misiri basa, butsira Abaisraeli. Ekya kani kyabya kihunzo eky’esisuki nene-nene esyabogha omw’amanyumba w’abanya Misiri. Ekihunzo ekya kathano kyabya okwa bisoro. Esyande nyingi n’esyambuli n’esyambene esy’abanya Misiri musya holha.

Erikwamyako, Musa na Haruni mubimya eribu n’eririghusa omwa mwanya. Mulyaletha ebimatha bibi okw’abandu n’ebisoro. Eki kyakyabya ekihunzo eky’omukagha.

Enyuma waho Musa mwa sumbira ebyalha biwe by’endatha omwa kyanya, na Yehova mwa thuma obuthuku n’embulha y’amathu. Yabya embulha ey’amathu enyibi ey’abanya Misiri bathe bathabana.

Ekihunzo eky’omunani ryabya erithu ery’esyangike. Isihali hathabya kutse sihali hathasyabya esyangike nyingi ng’esyo. Musyalya obuli kindu kyosi ekya sighalha okw’ithendi tsandibwa n’embulha ey’amathu.

Ekihunzo eky’omwenda mwabya mwirima. Omwa biro bisathu omwirima mwa swika ekihugho, aliriryo Abaisraeli banabya n’ekyakakalha ahababya b’ikere.

Erighunzerera, Nyamuhanga mwabwira abandu biwe batsatsange omusasi ow’ekyana ky’embene kutse ekyana ky’embuli w’okwa syanyuyi syabu. Neryo malaika wa Nyamuhanga mwa kyurukira okwa Misiri. Malaika anabya amalhangira omusasi, isyali itha mundu wosi-wosi ow’omwa nyumba eyo. Aliriryo esyanyumba esithabya kw’omusasi okwa syanyuyi, malaika wa Nyamuhanga mw’itha ehimbere hyosi hy’abandu n’ebisoro. Eki kyabya kihunzo ekye 10.

Enyuma w’ekihunzo eky’erighunzerera eki, Farao mwabwira Abaisraeli athi baghende. Abandu ba Nyamuhanga babya ibabiri yitheka-theka erighenda, neryo ekiro ekyo mubatsuka olhughendo lhw’erilhua e Misiri.