Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ekitabu Kyaghe Eky’Esyangano sye Biblia

 OLHUGHANO 4

Ekyaleka Ibaherya Eka Yabu

Ekyaleka Ibaherya Eka Yabu

THATHUNGERERA ekikabanika lino. Adamu na Eva bakahighithawa omw’irima lya Edeni eryuwene. Wunasi nga ni busana naki?

Ni busana mubakolha ekindu kibi. Busana n’ekyo Yehova akabasuyira. Wunasi ekibi Adamu na Eva babya bakolire?

Mubakolha ekindu Nyamuhanga abathanga athi sibakole. Nyamuhanga mwababwira athi banganalya ebyalya erilhua okwa mithi ey’omwirima. Aliriryo omuthi mughuma, Nyamuhanga mwabathanga athi isibalya kuwo, bithe bithya banga holire. Mwahiraho omuthi oyo ng’owiwe. Kandi thunasi ngokwa ni kibi erithwalha ekindu kyabene, kwa bithe? Neryo, ekyabya kyabere niki?

Kiro kighuma Eva abere ane omw’irima mw’iyuwene, enzoka muyakania nayu. Thalengekania okw’ekyo! Mwayabwira Eva erirya okwa kighuma eky’omuthi owa Nyamuhanga abathanga eriryako. Kandi, omughulhu Yehova akolha esyanzoka mwatha si kolha ng’esya ngabugha. Eki kikamanyisaya kithi owundi mundu akolesaya enzoka erikania. Oyo abya inindi?

Abya isi Adamu. Kwesi angabya inyabya mughuma okw’abandu aba Yehova akolha kera athali akolha ekihugho. Abandu abo b’abamalaika, kandi si thwanga balhangira. Omumalaika mughuma ono abya inyabiribya n’emiyiheko. Mwatsuka erilengekania athi atholere eribya muthabali nga Nyamuhanga. Kandi aby’anzire abandu bamwowe omwa mwanya w’eriowa Yehova. Yuwabya malaika oyuwabughisaya enzoka.

Malaika ono mwathoka eritheba Eva. Abere abiri mubwira athi angabere nga Nyamuhanga amalya ekighuma, neryo mwak’ikirirya. Neryo mwalya, na Adamu nayu mwalya. Adamu na Eva mubathowa Nyamuhanga, kya kyaleka ibaherya amaka w’eririma lyabu eryuwene.

Aliriryo endambi yikendi syahika Nyamuhanga akendi syalhangira athi ekihugho kyosi kikasuba ndeke ng’eririma lya Edeni. Embere thukendi igha ngokwa wangawathikya erikikolha wuthya. Aliriryo lino, thutha lebya ekyabya kyabere oku Adamu na Eva.