Ghenda ahali omwatsi

Ghenda ahali ebirimo

 OLHUGHANO 2

Eririma Eryuwene

Eririma Eryuwene

THUNGERERA ekihugho hano! Ebyosi kabyuwene! Thathungerera ebithi n’emithi, ebimole n’ebisoro ebyosi. Wangana sombolhamo enzoghu n’esyandale?

Eririma eryuwene eri lya banika lithi? Thuthalebyano, ngokwa Nyamuhanga athutheghekera ekihugho.

Erimbere, Nyamuhanga mwahangika ebithi bibisi eriswika ekithaka. Neryo mwakolha buli mulingo w’ebithi bike-bike n’ebisuki n’emithi. Ebindu ebi ebikalhasa bika wathikaya eryuwania ekithaka. Aliriryo biwithe n’omubongo owalengire aho. Ebingi kubyo nibya, bikathuha ebyalya ebikasiha ndeke.

Enyuma waho Nyamuhanga mwakolha esiswe eriziha omwa maghetse n’ebinyonyi erighulhukira omwa kyanya. Mwakolha esyambwa n’ehipusu n’esya sabayiri; ebisoro binene-binene n’ebike-bike. Ni bisoro ki ebiri hakuhi n’eka yenyu? Sithwangabya n’obutseme thuthi Nyamuhanga mwathukolera ebindu byosi ebi?

Erighunzerera, Nyamuhanga mwakolha ekitsweka kighuma eky’ekihugho mwa ky’embaghane. Mwahulha ekitsweka kino mw’eririma lya Edeni. Lyabya lihikene. Obuli kindu mulyo kyabya kibuya. Kandi Nyamuhanga aby’anzire ekihugho ekyosi ikyuwana ng’eririma lino ery’akolha.

Aliriryo thathungerera ekisasani eky’eririma lino kandi. Wunasi ekya Nyamuhanga abya alhangire athi kibulirwemu? Thulebaye.