Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ni Bahi Abakakolha Erisonda lya Yehova Munabwire?

 ERISOMO 14

Ni Kangirirya Lyahi Erya Batemburi Bakahebawa?

Ni Kangirirya Lyahi Erya Batemburi Bakahebawa?

Amerika

Esukuru ye Gileadi, e Patterson, New York

Panama

Erikangiriribwa ly’ekiteokrasi ni mubere owatsuka kera aw’Abema ba Yehova. Abakahayo obuthuku bwabo bwosi omwa mubiiri w’Obwami ow’erithulira bakahebawa erikangirirya ery’embaghane nuku ‘baberereraye emibiiri ya Nyamuhanga.’—2 Timoteo 4:5.

Esukuru ey’Omubiiri w’Obutemburi. Omutemburi w’omughulhu wosi akabya abirighunza mwaka mughuma inianemukolha obutemburi, neryo akabya iniamatholera erighenda okwa sukuru eyikaghunza biro mukagha eyikabya okwa Kisenge ky’Obwami ekiri hakuhi. Ekighendererwa kyayu ly’eriwathikya omutemburi eriyithunda hakuhi na Yehova, erithoka ndeke erisangira omwa syonzira syosi sy’erithulira, n’erilholha embere omwa mubiiri buthaleghulha.

Esukuru ey’Abathuliri b’Obwami. Esukuru eyikaghunza emyezi ibiri eyi, yikolirwe erithendeka abatemburi abasi ndeke abanayitheghekire erilhua ewabu eriyakolera aho banga thumwa. Ni bugha ambu, bakabugha bathi, “Ingye yono hano. Wunyithume!” omw’igherererya Omuthuliri mukulhu oyuwabirithabyaho okwa kihugho, Yesu Kristo. (Isaya 6:8; Yoane 7:29) Erighenda haali okw’eka yenyu kyangana yithagha eryolhobya engebe. Emibere y’abandu bayu, emibere y’obuthuku, n’ebyalya byanganabya by’embaghane kutsibu okwa bya mundu abeghere. Kandi nibya ikyangana yithaghisibwa erigha omubughe wayo. Esukuru eyi yikawathikaya balikyethu abahuru n’abathahenie, abali ahakathi-kathi k’emyaka 23 na 65, eribya n’emibere ey’obunyakirimu eya bakayithagha bakakolha omubiiri wabu n’amenge awakendi bathokesya erikolesibwa kutsibu na Yehova n’ekithunga kiwe.

Esukuru eye Gileadi. Omwa Kiheburaniya, ekinywe “Gileadi” kikamanyisaya “Ekirundu ky’Obwema.” Aho sukuru ye Gileadi yathatsukira omu 1943, abandu abalhabire omu 8,000 ababirilhaba omwa sukuru eyi babirithumwa ng’abamisani eriha obwema “oko kihugho kyosi” kandi babirithoka ndeke. (Emibiri 13:47) Abalhua okwa sukuru eyi babere bakahika e Peru, omwa kihugho ekyo simwabya kithunga kyosi-kyosi. Lino muli ebithunga ebilhabire omwa 1,000. Omughulhu Abamisani bethu batsuka erikolha omu Japan, yabya abathuliri bake okw’ikumi. Lino yiri abathuliri abalhabire omu 200,000. Amezi athano w’erithendekwa ery’esukuru ye Gileadi mwamuli erigha ndeke Ekinywe kya Nyamuhanga. Abakakolha ng’abatemburi b’omughulhu wosi kutse abamisani, abakakolera okwa byaghanda by’omuthahulha, kutse abalebererya b’omuthimbo bakabirikirawa okwa sukuru eyi busana n’erikangiriribwa ndeke eriwathikya omw’ighumya omubiiri w’ekihugho kyosi.

  • Ekighendererwa eky’Esukuru ey’Omubiiri w’Obutemburi ni kyahi?

  • Esukuru ey’Abathuliri b’Obwami yikolirwe busana na bahi?