Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ni Bahi Abakakolha Erisonda lya Yehova Munabwire?

 ERISOMO 10

Eriramya ly’Eka Niki?

Eriramya ly’Eka Niki?

South Korea

Brazil

Australia

Guinea

Erilhua kera, Yehova anzire abali omwa buli eka ibabana obuthuku obw’eribya haghuma, erighumya obunyakirimu bwabu n’engolongana yabu. (Eryibuka Ebihano 6:6, 7) Eki kya kikaleka Abema ba Yehova ibahira h’obuthuku obuli yenga nuku baramiraye haghuma ng’eka—erikania ibane omwa mibere eyithekene okwa myatsi ey’obunyakirimu eyihambire okwa biyithawa byabu. Nomuwangabya iwikere iwuwene, iwangana kolesya obuthuku obo iwune na Nyamuhanga omw’igha omwatsi owaseghemere okwa Biblia ogho wabirisombolha.

Ni buthuku obw’eriyithunda hakuhi na Yehova. “Muyithunde hakuhi na Nyamuhanga, nayu akendi yithunda hakuhi nenyu.” (Yakobo 4:8) Thukongera eriminya Yehova ya ndeke omughulhu thuk’igha buuli okwa mibere yiwe n’eby’akakolha erilhabira omwa Kinywe kiwe. Enzira nyolho ey’eritsuka eriramya lyawu ery’eka ly’erikolesya okwa buthuku obo erisoma haghuma e Biblia omwa mirenge eyikowika, obundi erikwama endegheka ey’obuli yenga ey’Omuhindano ow’Engebe n’Omubiiri Wethu. Obuli mundu anganahebwa ah’erisoma, neryo abosi ibakania okwa bya bam’igha omwa Masako.

Ni buthuku obw’eka eryongera eribya bughuma. Abalhume n’abakali babu, ababuthi n’abaana babu, bakakamathaya obughuma bwabu bak’igha e Biblia ya haghuma ng’eka. Butholere ibwabya buthuku obw’etseme, obuthekene obwa buli mundu wosi omw’eka akalindirira obuli yenga. Ababuthi bangana sombolha emyatsi eyitholere ey’erikaniako erikwamana n’emyaka y’abaana babu, obundi ng’erikolesya eyikabya omwa Akaleberyo na Awake! kutse okwa muthahulha wethu owe jw.org. Mwangana kania okwa bitsibu ebya baana benyu balyabana okwa sukuru kandi ngoku banga birwanisya. Busana naki iwuthalebya ebikasira okwa tivi eye jw.org (tv.jw.org) mwanakania kuyo haghuma enyuma waho. Mwangan’imba esyonyimbo esikendi syakolesibwa omwa mihindano n’erirya ebyalya haghuma mwabirighunza eriramya ly’eka.

Endambi eya mukaghunza imune haghuma eyi mukaramya Yehova yikendi wathikya abosi abali omw’eka eritsemera Ekinywe kya Nyamuhanga, kandi akendi tsumulha kutsibu akaghalha akamukahiraho.—Esyonyimbo 1:1-3.

  • Busana naki thukahira h’endambi ey’eriramya ly’eka?

  • Ababuthi bangakolhaki nuku obuli mundu omw’eka atsemere endambi eyi?