Congo (Kinshasa)

Rwanda

Ekitahu ky’ebihandiko bya kera ekiri kw’erina lya Nyamuhanga omwa Kihebrania ekyakera omwa Esyonyimbo 69: 31, erilhua omwa kighonye ekyakasathu kutse ekyakani E.K.

Ahabw’emyaka mingyi, Abema ba Yehova mubakolesya esyombindulha muthina-muthina esye Biblia, bamasiprintinga, n’erisighaba. Aliriryo muthwalhangira ngoku hali ekiyithawa eky’erihulhukya embindulha nyihya-nyihya eyanga wathikya abandu “eriminya ndeke omwatsi w’ekwenene,” kundi eri ni sonda lya Nyamuhanga. (1 Timoteo 2:3, 4) Busana n’ekyo, omo mwaka owa 1950 muthwatsuka erihulhukya ebitsweka ebye Biblia yethu eya New World Translation omwa mubughe owa munabwire. Omwa buyisiwa, e Biblia eyi yabirihindulhwa ndeke-ndeke omwa mibughe eyilhabire omu 130. *

E Biblia eyolhobire eriyitheghererya muyayithaghisibwa. Emibughe yikabya iyine muhinduka, kandi esyo Biblia nyingyi sikakolesaya ebinywe ebikalire eriyitheghererya. Eryongera okw’ekyo, emikunzo eya kera eyiri mw’Amasako awahambangene ndeke-ndeke n’aw’erimbere-mbere yabiribumburwa. Eki kikaleka ihathasyabya eriyitheghererya ndeke-ndeke emibughe eyakolesibawa e Biblia yikasakangwa—Ekihebrania, Aramaiki, n’Ekigiriki.

Muhabya ekiyithawa eky’erihindulha Ekinywe kya Nyamuhanga ngoku kyanabya. Omwakanya k’erilhusyamu kutse erihiramu ebithabyamu, abakahindulha e Biblia batholere ibahindulha ngoku bine omwa masako awakera. Aliriryo, omwa syo Biblia nyingyi, erina lya Nyamuhanga, Yehova, siririmo.

E Biblia eyikahalhamba Mwinyeyo muyayithaghisibwa. (2 Samweli 23:2) Omwa Biblia eya New World Translation, erina Yehova lyabirihirwa ahalikabanika omwa mikunzo eya kera eye Biblia emirundi 7,000 ngoku kikanganibwe omwa ky’erileberyako ekiri ahikwa hano. (Esyonyimbo 83:18, NW) Erisekulya kutsibu eryakolhawa ahabw’emyaka mingyi eri lyabirileka ikyatsemesya wukasoma e Biblia eyi kundi yikakanganaya ndeke amalengekania wa Nyamuhanga. Mbulha wuwithe e Biblia eya New World Translation omwa mubughe wawu kutse eyihi, thukakuhira mw’omuhwa ow’erihira h’endegheka eyuwene ey’erisoma Ekinywe kya Yehova buli kiro.—Yosua 1:8; Esyonyimbo 1:2, 3.

  • Ni kyahi ekyaleka ithwalhangira ngoku hatholere ihabya embindulha nyihya-nyihya ye Biblia?

  • Ni kindu kyahi kibuya ekyo omundu oyuwanzire eriminya erisonda lya Nyamuhanga atholere erikolha buli kiro?