Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Gherereraya Erikirirya Lyabu

 Enzukanzukana

Ebaruha Erilhua Okwa Kathunga Akakasondolha

Ebaruha Erilhua Okwa Kathunga Akakasondolha

Balikyethu banzwa:

E Watchtower eya Januare 1, 2008 ey’erighaba muyatsuka eribya yikasira mw’emyatsi eyiwithe omuthwe “Gherereraya Erikirirya Lyabu.” Kikatsemesaya indi eritsuka-tsukana n’egazeti eyi, obuli mezi asathu hakahulhuka omwatsi muhyaka!

Abandu bakabugha bathiki okwa myatsi eyi? Omusomi mughuma abere abirisoma ebihambire oku Marata, mwahandika athi: “Munaseka nabirisoma omwatsi oyu kundi ku ngane ng’iyo, kundi nayi nganzire erikokya abandu mughulhu wosi kandi inayisulhusuthya kutsibu neryo inibirirwa eribya inangan’ikalha n’erisatha nabu.” Omunyethu mughuma abere abirisoma ebihambire oku Esiteri, mwabugha athi: “Munalhangira ithwangananza kutsibu eryambalha okwa buli lhukimba olhwa hulhukire. Ni kwenene thutholere ithwambalha ndeke n’eriyipamba; aliriryo sithutholere thukalhabirirania.” Kandi athi: “Ekya Yehova akatsomana y’emithima yethu.” N’omwatsi owabya ahambire okwa mukwenda Petero mwaleka mwali wethu iniabugha athi: “Ingye wosi mumwanyingirya ndeke omwa mwatsi wa Petero. Namayitheghereryagho ndeke! N’eriyowa nga nganalhangire omwatsi oyu akabya.”

Abasomi aba—n’abandi bangyi ababirihandika bakakangania eryanzisibwa lyabu okwa myatsi eyi—bakalighirana n’eby’omukwenda Paulo ahandika kera athi: ‘Ebyosi ebyasakawa erimbere omwa Masako byasakawa busana n’erithukangirirya.’ (Abar. 15:4) Kwenene Yehova ahira emyatsi eyi omwa Biblia busana n’erithukangirirya ebyanga thughasira. Ithwe bosi, mbulha thwamaghunza myaka mingahi omwa kwenene, ithukend’igha bingyi omwa myatsi eyi.

Thukabahira mw’omuhwa w’erisoma ekitabu eki. Kihire okwa ndegheka yenyu ey’Eriramya ly’Eka—abaana bakendi kyanza! Omughulhu kikendi sy’ighibwa omw’Igha lye Biblia ery’Ekithunga, isiwabulhaho kiro na kighuma! Kisome iwunayithondwerye; kithwale lyolho. Ghaniraya ndeke; ibya nga wunalhangire ebikabya. Lengaho eriyihira omwa kisuko ky’abakakanibawako omwa Biblia, eribya nga wunalhangire ebyo balhangira. Lengekanaya okwa bya bakolha omughulhu babya omwa mibere mirebe kandi nga wanga kolireki kuwabya in’iwe.

Thutsemire kutsibu eribahikya kw’ekitabu kino. Ambi ikyabya ng’omughisa okw’iwe n’eka yawu. Thubawithire olhwanzo lhunene kandi thukabasunzira ebibuya,

Akathunga Akakasondolha ak’Abema ba Yehova