Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

E Biblia Yanga Thukangiriryaki?

 ESURA Y’ERIKUMI N’ITHANO

Enzira Eyihikire ey’Eriramiryamo Nyamuhanga

Enzira Eyihikire ey’Eriramiryamo Nyamuhanga

1. Nindi oyuwanga thubwira enzira eyihikire ey’eriramiryamo Nyamuhanga?

HAKUHI obuli dini yosi yikabugha yithi yikakangiriraya ekwenene eyihambire oku Nyamuhanga. Aliwe ekyo sikyangathokekana, kundi amadini akakangiriraya ebithasosene ebihambire oku Nyamuhanga nga nindi kandi ngoku thwanga muramya. Thwangaminya thuthi enzira eyihikire ey’eriramiryamo Nyamuhanga? Yehova musa yuwanga thubwira ngoku thutholere ithwamuramya.

2. Wangaminya wuthi enzira eyihikire ey’eriramiryamo Nyamuhanga?

2 Yehova abirithuha e Biblia nuku thwangaminya enzira eyihikire ey’erimuramiryamo. Neryo igha e Biblia, na Yehova akendi kuwathikya erighasirwa omw’ikangirirya liwe kundi akutsomene kutsibu.Isaya 48:17.

3. Nyamuhanga anzire ithwakolhaki?

3 Abandi bandu bakabugha bathi Nyamuhanga akaligha amadini wosi, aliriryo Yesu mwathabugha ekyo. Mwabugha athi: “Si y’omundu oyukanyahulha athi, Mukama, Mukama, yuwasyingira omwa bwami bw’elhubulha; nikwa yo n’oyukakolha erisonda lya Thatha waghe.” Kwesi ni kikulhu eriminya erisonda lya Nyamuhanga nga ni ryahi neryo ithwakolhalyo. Oyu si mwatsi w’amasatha kundi Yesu mwakangania ngoku abathekenga Nyamuhanga ni “bakolha-nabi.”Matayo 7:21-23.

4. Yesu mwabugha athiki okw’ikolha erisonda lya Nyamuhanga?

4 Yesu mwakikangania ndeke-ndeke athi omughulhu thukanza erikolha erisonda lya Nyamuhanga, ithukendi bana ebitsibu. Mwabugha athi: “Mwingire omwa lhukyo lhuke; kusangwa  olhukyo ni lhunene, n’enzira ni nene-nene eyikalholhaya okw’ihera, kandi ni bangyi abakingira omwa lhukyo olho; nikwa olhukyo ni lhuke, n’enzira ni nge eyikakolhaya okwa ngebe, n’abandu ni bake abakabanayo.” (Matayo 7:13, 14) Enzira nyike kutse eyihikire ey’eriramiryamo Nyamuhanga, yikakolhaya okwa ngebe y’erikotha. Enzira nene, kutse enzira eyiwire ey’eriramiryamo Nyamuhanga, yikakolhaya okwa lhuholho. Aliriryo Yehova syanzire omundu n’omughuma akaholha. Akaha abandu ehosi-hosi b’akaghisa ak’erimw’ighako.2 Petero 3:9.

ENZIRA EYIHIKIRE EY’ERIRAMIRYAMO NYAMUHANGA

5. Wanga minya wuthi abakaramaya Nyamuhanga omwa nzira eyihikire?

5 Yesu mwabugha athi thwangana minyerera abakaramaya Nyamuhanga omwa nzira eyihikire. Thukabaminyerera omw’irebya ebya bikirirye n’erikolha. Mwabugha athi: “Mwasyaminyererabo busana n’emibiiri yabu.” Kandi mwongera athi: “Omuthi mubuya akahethaya ebighuma ebyuwene.” (Matayo 7:16, 17) Eki sikiri manyisaya kithi abakaramaya Nyamuhanga bahikene. Aliriryo abaghombe ba Nyamuhanga bakalengaho mughulhu wosi erikolha ekihikire. Lino thulebaye ebikendi thuwathikya eriminyerera abakaramaya Nyamuhanga omwa nzira eyihikire.

6, 7. Busana naki esyongangirirya esy’eriramya ly’okwenene siseghemere okwa Biblia? Eky’erileberyako kya Yesu kikathweghesayaki?

6 Erikangirirya lyethu litholere iryaseghemera okwa Biblia. E Biblia yikabugha yithi: “Amasako wosi Nyamuhanga yuwatheghekanayawo. Kandi ali n’endundi busana n’erikangirirya omwatsi w’ekwenene kandi busana n’erithukunga erihaba, kandi busana n’erihabulha, n’erikangirirya abandu erikwama ekithunganene. Neryo omundu wa Nyamuhanga ahikane, n’erithokesibwa erikolha obuli mubiiri uwene.” (2 Timoteo 3:16, 17) Omukwenda Paulo mwahandikira  Abakristayo athi: “Omughulhu thwabalethera ekinywe kya Nyamuhanga, mumuthowakyo n’eriangirirakyo ng’ekinywe ky’abandu, nikwa ngoku kiri kwenene, ekinywe kya Nyamuhanga.” (1 Abanya Tesalonika 2:13) Eriramya ery’okwenene liseghemere okwa Kinywe kya Nyamuhanga, e Biblia. Siriseghemere okwa malengekania kutse emirwa y’abandu.

7 Ebyosi ebya Yesu akangiriraya byabya biseghemere okwa Kinywe kya Nyamuhanga. (Soma Yoane 17:17.) Iniakabugha ebiri omwa Masako. (Matayo 4:4, 7, 10) Abaghombe ba Nyamuhanga bakakwama eky’erileberyako kya Yesu kandi bakaseghemeraya ebyosi ebya bakakangiriraya okwa Biblia.

8. Yesu mwathukangirirya athiki okw’iramya Yehova?

8 Thutholere ithwaramya Yehova musa. Esyonyimbo 83:18, NW hakabugha hathi: “Iwe wukahulhawa mwa Yehova, n’iwe musa oyuli Endatha Kutsibu okwa kihugho kyosi.” Yesu aby’anzire abandu ibaminya Nyamuhanga w’okwenene nga yo wahi, neryo mwakangiriraya abandu b’erina lya Nyamuhanga. (Soma Abaebrania 2:12.) Yesu mwabugha athi: “Ni Yehova Nyamuhanga wawu oyo wutholere iwaramya, kandi n’iyo musa oyo wutholere erikolera.” (Matayo 4:10, NW) Neryo ng’abaghombe ba Nyamuhanga, thukakwama eky’erileberyako kya Yesu. Thukaramaya Yehova musa, ithwakolesya erina liwe, n’erikangirirya abandi b’erina liwe n’eby’akendi syathukolera.

9, 10. Thukakanganaya thuthi olhwanzo owundi busana n’owundi?

9 Thutholere ithwakangania abandu b’olhwanzo lhw’okwenene. Yesu mwakangirirya abigha biwe athi banzane. (Soma Yoane 13:35.) Abakristayo abakera babya bawithe olhwanzo ng’olhu. Olhwanzo olhwa Nyamuhanga anzire ithwakangania olhu lhukaghunzaho akasolholho k’ebihanda n’ak’erangyi, n’eriletha abandu ba haghuma omwa bughuma obuthethwika obw’abalikyethu ab’okwenene. (Abanya Kolosai 3:14) Thukakolha eki mbulha thulhuire omwa mibere  eyisosire yithi, esyonganda, kutse mbulha thuli bagaga kutse bera. Erianzana litholere iryaleka ithwabya bughuma ng’abasubeneko. (Abanya Kolosai 3:14) Neryo sithuli yingiraya omwa syonyuhi n’er’itha abandu. E Biblia yikabugha yithi: “Omw’eki abaana ba Nyamuhanga n’abaana ba Sitani baminyikere. Oyuthekolha ebithunganene, kutse omundu oyuthanzire mulikyabu, abo si baana ba Nyamuhanga.” Kandi yithi: “Thwanzane, si thubye nga Kaina, oyuwabya w’omubi oyo, neryo mwitha mulhumuna wiwe.”1 Yoane 3:10-12; 4:20, 21.

10 Thukakolesaya endambi, akaghalha, n’ebya thuwitheko erisikania emithima. (Abaebrania 10:24, 25) Thukakolha “ebibuya okwa bandu abosi.”Abanya Galatia 6:10.

11. Busana naki thuk’ikiriraya Yesu ng’enzira eyikakolhaya oku Nyamuhanga?

11 Thutholere ithwowa Yesu kundi ya nzira eyikakolhaya oku Nyamuhanga. E Biblia yikabugha yithi: “Erilhama siriri omwa wundi mundu, kusangwa Nyamuhanga syalithahulha erindi rina omwa kihugho kyosi omwa kathi-kathi k’abandu, eryanga thulhamya.” (Emibiri 4:12) Omwa Sura 5 ey’ekitabu kino, muthw’igha ngoku Yehova mwathuma Yesu erisyahayo engebe yiwe ng’embanulho busana n’abandu abwowa. (Matayo 20:28) Yehova abirisombolha Yesu eribya Mwami omwa Bwami bw’elhubulha obukendi syathabalha ekihugho. Ky’ekikaleka e Biblia iyathubwira yithi thutholere ithwowa Yesu thwamabya thwanzire erisyabyaho kera na kera.Soma Yoane 3:36.

12. Busana naki sithuliyingiraya omwa by’ekipolitiki?

12 Sithutholere thukayingirya omwa by’ekipolitiki. Yesu mwathayingirya omwa by’ekipolitiki. Abere anemuthonganisibwa, mwabwira omuthabali we Roma, iya Pilato athi: “Obwami bwaghe si bw’ekihugho kino.” (Soma Yoane 18:36.) Nga Yesu, thukasighika Obwami bwa Nyamuhanga obw’elhubulha, neryo busana n’eki, nomuthwangabya ithuli  omwa kihugho kyahi, sithuli yingiraya omwa by’ekipolitiki. Aliwe, e Biblia yikathulhaghira yithi thusikaye “abathabali b’ekihugho.” (Abanya Roma 13:1) Thukasikaya ebilhaghiro by’ekihugho ekya thwikeremu. Aliwe, ekilhaghiro kyamaghania ebihano bya Nyamuhanga, thukagherereraya abakwenda, ababugha bathi: “Litholere ithwakenga Nyamuhanga kwilhaba abandu.”Emibiri 5:29; Mariko 12:17.

13. Ni kyahi ekya thukathulhughanaya ekihambire oko Bwami bwa Nyamuhanga?

13 Thwikirirye ngoku Obwami bwa Nyamuhanga busa bwa bukendi syaghunzaho ebitsibu. Yesu mwabugha athi “engulhu yuwene y’Obwami” yasyathulhughanibwa omwa kihugho kyosi. (Soma Matayo 24:14.) Sihali obuthabali bw’abandu obwanga kolha ekya Bwami bwa Nyamuhanga bukendi syathukolera. (Esyonyimbo 146:3) Yesu mwathukangirirya athi thusabe Obwami obo omughulhu abugha athi: “Obwami bwawu bwase. Erisonda lyawu liyirawe, omwa kihugho ngoku liri omwa lhubulha.” (Matayo 6:10) E Biblia yikathubwira yithi Obwami bwa Nyamuhanga bukendi syaghunzaho amathabali wosi w’abandu kandi yithi “nabo bwasyahangana kera na kera.”Danieli 2:44.

14. Wukalhangira ni bahi abakaramaya Nyamuhanga y’omwa nzira eyihikire?

14 Erikwamana n’esyonzumwa esi, yibulhaye: ‘Ni bahi abakaseghemeraya erikangirirya lyabu okwa Biblia? Ni bahi abakabwira abandi b’erina lya Nyamuhanga? Ni bahi abanzene kandi abakaligha ngoku Nyamuhanga mwathuma Yesu erithulhamya? Ni bahi abathayingiraya omwa by’ekipolitiki? Ni bahi abakakangiriraya bathi Obwami bwa Nyamuhanga busa bwa bukendi syaghunzaho ebitsibu byethu? Ba Bema ba Yehova basa.Isaya 43:10-12.

WUKENDI KOLHAKI?

15. Ni kyahi ekya thutholere ithwakolha thwamanza Nyamuhanga alighe eriramya lyethu?

15 Sikirighunza erikwama ky’erikirirya wuthi Nyamuhanga  aneho. Esyombinga nasyo sin’ikirirye sithi Nyamuhanga aneho, aliwe sisiri mwowa. (Yakobo 2:19) Thwamanza Nyamuhanga alighe eriramya lyethu, sithutholere thukikirirya thuthi aneho lisa, thutholere ithwakolha n’eby’akabugha.

16. Busana naki thutholere ithwaghana amadini w’amabehi?

16 Nyamuhanga eriligha eriramya lyethu, thutholere ithwaghana amadini w’amabehi. Omuminyereri Isaya mwahandika athi: “Mulhue omwa kathi-kathi kagho, muyeraye.” (Isaya 52:11; 2 Abanya Korinto 6:17) Ekyo ky’ekyanga leka ithwaghana ekindu kyosi-kyosi ekihambangene n’eriramya ly’amabehi.

17, 18. E “Babeli Mukulhu” niki, kandi busana naki ni kikulhu erighanayo omwa byalhuba?

17 Edini y’amabehi y’eyahi? Y’edini yosi-yosi eyikathukangiriraya eriramya Nyamuhanga omwa nzira eyithehambangana n’Ekinywe kiwe. E Biblia yikahulha amadini w’amabehi mwa “Babeli Mukulhu.” (Eribisulirwa 17:5) Busana naki? Enyuma w’Erighunga ly’Amaghetse omwa biro bya Noa, esyongangirirya nyingyi esy’amabehi musyatsuka omwa muyi we Babeli. Esyongangirirya esyo musyayitsatsanga omwa kihugho kyosi. Ng’eky’erileberyako, abandu ababya bikere e Babeli ibakaramaya esyonyamuhanga isathu. Namunabwire, amadini mangyi akakangiriraya athi Nyamuhanga ni Busathu, aliwe e Biblia yikakangiriraya ndeke-ndeke yithi hali Nyamuhanga mughuma musa ow’okwenene, Yehova, kandi ngoku Yesu ni Mughalha wiwe. (Yoane 17:3) Kandi Abanya Babeli ibikirirye bathi omundu ali mw’akandu akatheholha akakabya ikaneho amaholha kandi bathi kangana yaghalhwa omwa muliro owa kera na kera. Ekyo si kwenene.—Lebaya Endomeko 14, 17 na 18.

18 Nyamuhanga abiribugha athi akisiya iniathoghothya amadini w’amabehi awosi aya. (Eribisulirwa 18:8) Wanamalhangira ekikaleka ikyabya ini kikulhu erilhua omwa madini w’amabehi omwa bya lhuba? Yehova anzire iwakolha ekyo endambi yithe yahwayo.Eribisulirwa 18:4.

Omw’ikolera Yehova iwune n’abandu biwe, iwukendi bana bingyi kwilhaba ebyawanga herya

19. Wamathwamu erikolera Yehova, iniakendi kutsomana athi?

 19 Wukabya wukathwamu erilhua omwa dini y’amabehi, abandi banywani bawu kutse ab’okw’iwe bangana ghana eriyitheghererya ekyamaleka iwathwamu wuthya kandi ibangana kwendererya. Aliwe Yehova syanga kulekerania. Wukendibya mughuma w’okw’ihiika linene ery’esyomiliyoni sy’abandu abanzene ndeke, n’eribya n’amaha aw’erisyabyaho kera na kera omwa kihugho kihya-kihya. (Mariko 10:28-30) Obuthuku ibwangana syahika, abakakughana busana n’erithwamu lyawu ery’erikolera Yehova ibasyaligha erigha e Biblia.

20. Busana naki ni kikulhu eriramya Nyamuhanga omwa nzira eyihikire?

20 Nyamuhanga akisiya iniaghunzaho obubi bwosi kandi Obwami bwiwe bukendi thabalha ekihugho. (2 Petero 3:9, 13) Obo ka bukendi syabya buthuku obuwene! Obuli mundu akendi syaramya Yehova ngoku Yehova anzire. Neryo ni kikulhu eriyira ekya wukakolha lino, wanaramya Nyamuhanga omwa nzira eyihikire.