Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Eka Yawu Yangana Tsema

 EKITSWEKA 1

Obutheke Eritsema, Yikethere Nyamuhanga

Obutheke Eritsema, Yikethere Nyamuhanga

‘Oyuwahangikabo erimbere, mwahangikabo omulhume n’omukali.’Matayo 19:4

Yehova * Nyamuhanga yuwamathanaya abatheke ab’erimbere. E Biblia yikathubwira yithi mwahangika omukali w’erimbere neryo ‘mwamuthwalira omulhume.’ Adamu mwatsema kutsibu, kyamaleka iniabugha athi: ‘Eri n’ikuha ly’amakuha waghe n’omunyoku w’omunyoku waghe.’ (Enzuko 2:22, 23) Na munabwire Yehova akinanzire abathahenie ibatsema.

Omughulhu wukingira omwa butheke, iwangana lengekania wuthi mukendibya omwa tseme nyisa-nyisa. Aliriryo omwa kwenene, omulhume na mukali wiwe, nibya n’abanzene kwenene, bakabana ebitsibu. (1 Abanya Korinto 7:28) Omwa katabu kano, wukendibana mw’emisingyi ye Biblia eyangaleka eka yenyu iyabya mw’etseme wamaghendera kuyo.Esyonyimbo 19:8-11.

 1 LIGHA OLHUKWAMIRWA OLHWA YEHOVA ABIRIKUHA

EKYA BIBLIA YIKABUGHA: Omulhume ya muthwe w’eka.Abanya Efeso 5:23.

Wamabya iwuthahirye, Yehova anzire iwatsomana mukali wawu ya ndeke. (1 Petero 3:7) Mwamuhangika ini muwathikya wawu, neryo anzire iwakolangana nayu iwunamusikirye kandi iwunamwanzire. (Enzuko 2:18) Wutholere iwanza mukali wawu ya kutsibu indi wukendyanza n’erihira ebiyithawa biwe by’embere okwa byawu.Abanya Efeso 5:25-29.

Wamabya iwuthahibwe, Yehova anzire iwasikya mwira wawu ya kutsibu n’erimuwathikya eriberererya olhukwamirwa lhwiwe. (1 Abanya Korinto 11:3; Abanya Efeso 5:33) Sighika eby’akathwamu n’erikolangana nayu ndeke. (Abanya Kolosai 3:18) Wamakolha wuthya, iwukendibya mubuya embere sya mwira wawu na Yehova.1 Petero 3:1-6.

EKYA WANGAKOLHA:

  • Bulhaya omwanze wawu nga wangabya wuthi mulhume mubuya kutse mukali mubuya embere siwe. Hulikirira ndeke, n’erikolha ekya wangathoka erithasyuwania ahatholere

  • Ghumisirizaya. Kikathwalha buthuku eriminya ngoku wanga tsemesya owundi

2 TSOMANA NDEKE ERIYOWA LY’OMWANZE WAWU

EKYA BIBLIA YIKABUGHA: Wutholere iwatsomana eriyisunza ly’omwanze wawu. (Abanya Filipi 2:3, 4) Ebya wukakolha okwa mwanze wawu bikanganaye kwa wukamulhangira mwa w’omughaso, kundi Yehova anzire obuli mughombe wiwe iniabya mubuya kutse mwolho embere sy’obuli mundu. (2 Timoteo 2:24) ‘Hali oyukabugha buthalengekania ng’eritsimitha ly’omuyali, nikwa olhulimi lhw’ab’amenge n’ilhamya.’ Busana n’ekyo, sombolha ndeke ebya wangabugha. (Emisyo 12:18) Omulimu wa Yehova akendi kuwathikya erikania omwa lhukeri n’omwa lhwanzo.Abanya Galatia 5:22, 23; Abanya Kolosai 4:6.

EKYA WANGAKOLHA:

  • Saba Yehova akuwathikaye eribya iwunathekene n’eribya n’omuthima w’erihulikirira muthe mwakania okwa mwatsi ow’akalire

  • Lengekanaya ndeke okwa kya wukendi bugha kandi nga wukendi kibugha wuthi

 3 MUBYE BUGHUMA OMWA MALENGEKANIA

EKYA BIBLIA YIKABUGHA: Omughulhu wukingira omwa butheke, iwe n’omwanze wawu mukabya ‘mubiri mughuma.’ (Matayo 19:5) Aliriryo mukabya imukine bandu babiri, abangana thunga amalengekania w’embaghane. Neryo kwesi mutholere imw’igha eribya bughuma omwa malengekania n’eriyowa. (Abanya Filipi 2:2) Ni kikulhu eribya bughuma mukathwamu. E Biblia yikabugha yithi: ‘Obuli yisunza likahanganibawa busana n’amahano.’ (Emisyo 20:18) Leka emisingyi ye Biblia yibasondole mukathwamu haghuma okwa bindu bikulhu omwa ngebe.Emisyo 8:32, 33.

EKYA WANGAKOLHA:

  • Bwira omwanze wawu eriyowa lyawu, butsira emyatsi n’ebya wukalengekanaya bisa

  • Kaniranaya n’omwanze wawu wuthe wayilhagha mwatsi

^ enu. 4 Yehova ni rina lya Nyamuhanga ngoku kikanganibwe omwa Biblia.