Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Eka Yawu Yangana Tsema

 Ekitsweka 7

Ngoku Wanga Kangirirya Omwana Wawu

Ngoku Wanga Kangirirya Omwana Wawu

‘Ebinywe ebyo nga kuhana munabwire, byasyabya omwa muthima wawu, kandi wasyakangiriryabyo abaana bawu n’omuhwa.’Eryibuka Ebihano 6:6, 7

Yehova abere akatsukisya endegheka y’obutheke, mwaha ababuthi b’olhukwamirwa lhw’eritheya abaana babu. (Abanya Kolosai 3:20) Ni lhukwamirwa lhwawu iwe ng’omubuthi erikangirirya omwana wawu eryanza Yehova n’erimukulya eribya mundu w’olhukwamirwa. (2 Timoteo 1:5; 3:15) Kandi wutholere iwaminya ebiri omwa muthima w’omwana wawu. Aliriryo, isiwibirirawa ngoku eky’erileberyako kyawu kya kikulhu. Wamatsuka erihira ebihano bya Yehova by’omwa muthima wawu, iwukendi thoka erikangiriryabyo omwana wawu.Esyonyimbo 40:8.

 1 LEKA KYOLHOBERE ABAANA BAWU ERIKANIA NAWU

EKYA BIBLIA YIKABUGHA: ‘Owa lhuba, nikwa si wubughe lhuba.’ (Yakobo 1:19) Lhangira wuthi wukaleka abaana bawu ibayowa buholho erikania nawu. Batholere ibakiminya ngoku wunayitheghekire eribahulikirira bakanza erikania nawu. Hira h’emibere eyuwene eyanga leka ikya bolhobera erikubwira ekibali okwa muthima. (Yakobo 3:18) Bamaminya bathi wukendi tsuruma kutse eribatsweba, isibangakubwira ebyosi ebiri okwa muthima. Abaana bawu bathwale lyolho, kandi bera eribakakasya ngoku wubanzire.Matayo 3:17; 1 Abanya Korinto 8:1.

EKYA WANGA KOLHA:

  • Hereraya abaana bawu b’obuthuku bakanza erikania nawu

  • Ibya iwunemukanirania n’abaana, butsira omughulhu basobirye lisa

2 LENGAHO ERIYITHEGHERERYA EKYA BAKANZA ERIBUGHA

EKYA BIBLIA YIKABUGHA: ‘Oyukakenga ekinywe asyabana ebibuya.’ (Emisyo 16:20) Okwa bundi buthuku, kyangana kuyithaghisya erikubungulha ndeke ebinywe by’abaana nuku wuminye ekya bakanza erimanyisya. Ni kya buli kiro abaana erilhabirirania omwa bya bakakanaya, kutse eribugha ebya bathemanyisaya. ‘Oyukasubiraya athali owa, ni bukiru n’esisoni busana nayu.’ (Emisyo 18:13) Isiwahithana lhuba-lhuba.Emisyo 19:11.

EKYA WANGA KOLHA:

  • Isiwabughira omwa baana bawu bakakania nomubanga bugha ebiri bithi

  • Th’ibuka nawu nga wabya wuthi omughulhu wabya omwa myaka yabu

 3 MUBYE BUGHUMA OMW’IHABULHA

EKYA BIBLIA YIKABUGHA: ‘Mughalha waghe, wuhulikirire erikangirirya lya thatha wawu, siwusighanaye erihana lya koyo wawu.’ (Emisyo 1:8) Yehova abiriha ababuthi abosi babiri b’olhukwamirwa lhw’erisondolha. Mutholere imwakangirirya abaana benyu erisikya n’eribya bowa. (Abanya Efeso 6:1-3) Abaana banganalhangira ngoku ababuthi babu si ‘babohene omwa bulengekania bughuma.’ (1 Abanya Korinto 1:10) Hamabya erikakakakania, isikyabya ahali abaana kundi ikikendi leka ibathabasikya inywe ng’ababuthi.

EKYA MWANGA KOLHA:

  • Mulighirane nga mwangahabulha muthi abaana benyu

  • Iwe n’omwanze wawu mwamabya n’ebirengekanio ebithasosene ngoku mwanga kangirirya abaana benyu, bulhaya omwanze wawu ng’akalhangira athi ekirengekanio kyawu

4HIRA H’EMITHEGHEKERE

EKYA BIBLIA YIKABUGHA: ‘Wukangiriraye omwana omo nzira eyimutholere erilhabamu.’ (Emisyo 22:6) Abaana bawu erikangiriribwa ndeke, sikyendyasa bwase. Wutholere iwahira h’emitheghekere ey’eribakangirirya, imwamuli n’eribakunga. (Esyonyimbo 127:4; Emisyo 29:17) Erikunga siry’erisuyira lisa, aliriryo muli n’eriwathikya abaana eriyitheghererya ekikaleka iwahira h’ebilhaghiro. (Emisyo 28:7) Kandi bakangiriraye erianza Ekinywe kya Yehova n’eriyitheghererya emisingyi eyirimu. (Esyonyimbo 1:2) Eki kikendi bawathikya eribya n’obunya muthima-thima obuwene.Abaebrania 5:14.

EKYA MWANGA KOLHA:

  • Mulhangire muthi abaana benyu bakalhangira Yehova ng’Omundu oyo bangana yikethera

  • Mubawathikaye eribya ibanganayiminyira n’eriyihighulha okwa byanga tsandya esyongeso mbuya, ng’ebikabanika okwa Intaneti. Mubakangiriraye ngoku banga yitheya okwa banganza eribakolesya eby’obusingiri

‘Wukangiriraye omwana omo nzira eyimutholere erilhabamu’