Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Eka Yawu Yangana Tsema

 EKITSWEKA 6

Ngoku Abaana Bakaletha Esyombinduka Omwa Butheke

Ngoku Abaana Bakaletha Esyombinduka Omwa Butheke

‘Abaana ni lhusunzo olhukalhua oku Yehova.’Esyonyimbo 127:3

Eributha omwana lyangana lethera abatheke b’etseme, aliriryo n’emisulhusutho minene. Inywe ng’ababuthi bahya-bahya, imwangana yisanga imwabirihwerya obuthuku n’akaghalha kenyu kosi okw’itsomana omwana. Erikuba othulho n’erisulhusutha kutsibu omwa malengekania byangana leka obughuma bwenyu ibwabya nga bukakeha. Erithoka eritsomana omwana wenyu n’eritheya obutheke bwenyu, ikikendi yithaghisya iwe n’omwanze wawu erikolha esyombinduka. Erihabulha lye Biblia lyanga bawathikya lithi erighumira ebitsibu ebi?

 1 MINYA NGOKU OMWANA AKALEKA EBINDU IBYAHINDUKA

EKYA BIBLIA YIKABUGHA: “Olhwanzo lhukaghumisirizaya kandi ni lhw’olhukeri.” Kandi olhwanzo “silhuli rondaya eriyitsomana ilholhwene, silhuli hithana kithya-kithya.” (1 Abanya Korinto 13:4, 5, NW) Ni kya buli kiro omukali oyuwamatsuka eribya mubuthi erihwerya amalengekania w’okw’omwana wiwe. Aliriryo mwira wawu iniangana tsuka eriyowa nga siwukimutsomene, neryo isiwibirirawa ngoku nayu akayithagha eritsomanwa. Omw’ighumisirizya n’erikangania olhukeri, iwangana muwathikya eriyowa ngoku wunamutsomene nibya iwune mutsomana n’omwana wawu.

‘Nenyu abiba wabu nibya, mwikale n’abakali benyu omwa menge.’ (1 Petero 3:7) Minya ngoku akaghalha kanene ka mukali wawu kakendi hwera oko mwana wawu. Okwa buthuku obu, akabya n’ebingyi by’erikolha neryo ibyangana mulhuhya kw’obwongo, inialhuha, kutse n’erimubulisya obuholho. Nibya n’okwa bundi buthuku angana kuhithanako, aliriryo lengaho eribya iwunathekene, kundi ‘oyukayibombeka okw’ihithana uwene kwilhaba ab’obuthoki.’ (Emisyo 16:32) Kanganaya obuyitheghererya, n’erimuha obuwathikya obw’akayithagha.Emisyo 14:29.

EKYA WANGA KOLHA:

  • Abathatha: Wathikaya mukali wawu eritsomana omwana, nibya n’omwa kiro. Kehaya obuthuku obwa wukakolesaya okwa yindi mibiiri nuku wanga bana obuthuku obukaghunza eribya na mukali wawu n’omwana wawu

  • Abamama: Mwira wawu amanza erikuwathikya erilembera omwana, ligha obuwathikya obo. Amathendi muhamba ndeke, isi wamutsweba, aliriryo omwa lhwanzo, mukanganaye ngoku angamulembera

 2 MUGHUMAYE OBUGHUMA BWENYU

EKYA BIBLIA YIKABUGHA: ‘Basyabya mughuma.’ (Enzuko 2:24) Nomwakine indi omwa butheke bwenyu mwamabiringira owundi mundu, mutholere imwabya imun’ibukire ngoku mukine mubiri ‘mughuma.’ Mukole ekyosi-kyosi obughuma bwenyu eribya ibunawathire.

Abakali, musime obuwathikya obwa bira benyu bakabaha. Ebinywe ebya mukakolesaya mukasima byangana ‘lhamya’ kutse erihumulikania. (Emisyo 12:18) Abiba, mubwire bakali benyu ngoku mubanzire kutsibu kandi ngoku mukabalhangira mw’ab’omughaso. Pipa mukali wawu busana n’emibere ey’akatsomanira mw’eka yenyu.Emisyo 31:10, 28.

‘Omundu syasondaye endundi yiwe iyowene-wene, nikwa asondaye endundi busana n’omulikyabo.’ (1 Abanya Korinto 10:24) Kolha ekyanga tsemesya omwanze wawu. Inywe babiri, mubane obuthuku bw’erikanirania, erisimangana, n’erihulikirirana. Si wuyitsomane bikahika okwa myatsi y’engyingo. Tsomana ebiyithawa by’omwanze wawu. E Biblia yikabugha yithi: ‘Simwimangane muthalyalhaghana erikolha muthya.’ (1 Abanya Korinto 7:3-5) Neryo kwesi mukaniranaye ndeke okwa mwatsi oyu. Erighumisirizya lyawu n’obuyitheghererya ibikendileka obughuma bwenyu ibwa kamatha.

EKYA WANGA KOLHA:

  • Isiwibirirawa erihira h’obuthuku obw’eribya haghuma inywe babiri

  • Kolha n’ehindu hike-hike ehyanga leka omwanze wawu iniayowa ngoku wumwanzire, ng’erihandika akabaruha kutse erimuha akasembo

 3 ERIKANGIRIRYA OMWANA WAWU

EKYA BIBLIA YIKABUGHA: ‘Eritsuka omo bwana bwawu wabiriminya amasako abuyirire, awakathoka erikuha amenge w’erikuthwalha okw’ilhamibwa.’ (2 Timoteo 3:15) Musangwe mwathegheka ekya mukendi syakolha erikangirirya omwana wenyu. Awithe amaaka w’erigha, nibya iniakine n’omwanda. Omwana iniakine n’omwanda, angana minyerera omulenge wawu n’eriminya ngoku wukayowa. Musomere iniakine lhumekeke. Nomw’athe anga yitheghererya ebya wukasoma, ikyangana syamuwathikya eritsemera erisoma abirikulha.

Isi walengekanaya wuthi omwana wawu ni mwana kutsibu okw’imukanirya oku Nyamuhanga. Saba Yehova omwana inian’owire. (Eryibuka Ebihano 11:19) N’omughulhu mukasatha, kanaya okwa bya Nyamuhanga abirihangika. (Esyonyimbo 78:3, 4) Omwana wawu akendibya anemukulha, akendi lhangira ngoku wanzire Yehova neryo ikyaleka nayu iniamwanza.

EKYA MWANGA KOLHA:

  • Musabe Yehova y’amenge ngoku mwanga kangirirya omwana wenyu

  • Subirira omwa binywe n’esyonzumwa nkulhu-nkulhu omwana angatsuka lhuba erigha