Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ebibulyo 10 Ebya Balere Bakabulhaya n’eby’Erisubirya

 EKIBULYO 1

Nganayasi?

Nganayasi?

EKIKALEKA IKYAKANIBWAKO

Eriminya nga wuli ndi n’ebya wutholere iwasighika kikendi kuwathikya erithwamu ndeke wukabana akahathikano.

IWE IWUKENDI KOLHAKI?

Thalengekania oku kino: Karen amahika okwa kagheni k’eriyitsemesya, buthuku buke-buke, akowa omundu ey’anasi akabugha nayu.

“Habwaki wuk’imana aho ha buyira?”

Karen akabya akabinduka, akalhangira ini munywani wiwe Jessica iniane n’esyotsupa ibiri. Akalhangira omwa syotsupa imuli obwabu. Jessica akasumbira Karen y’etsupa nguma n’eribugha athi, “Siwukiri mwana okw’ithayitsemesya kake, kwa bithe?”

Karen anzire iniaghana, kandi ibbwa Jessica ni munywani wiwe. Syanzire munywani wiwe oyu akamuthwalha ng’oyuthatsomene eriyitsemesya. N’ekindi kiryaho, Jessica anasibwe ku ni musika w’esyongeso. Nayu amabya iniangananywa, obo isi kitsibu. Karen akayibwira athi, ‘Na ka n’ithanywa buyira. Sikiri ng’erirya ebibatsi ebikathamiraya.’

Ku wabya in’iwe Karen, wanga kolireki?

THATSUKA ERILENGEKANIA!

Erithwamu ndeke omwa mibere ng’eyi, wutholere iwabya iwunayasi. Eriyiminya eri ly’eribya iwunasi omwa muthima iwe nga wuli ndi n’eriminya ebya wutholere iwasighika. Wamabya iwunabyasi, wukabya iwuwithe amaaka w’erisondolha engebe yawu omwakanya k’abandi erikusondolerayo.—1 Abanya Korinto 9:26, 27.

Amaaka ng’ayo wanga thungagho wuthi? Eribana eby’erisubirya okwa bibulyo ebya thukaya lebaya ikyangana wathikya.

 1 NI BYAHI EBYA NGATHOKA?

Eribya iwunasi ebya wukathoka n’emibere yawu eyuwene kikendi leka iwuthayighaya.

EKY’ERILEBERYAKO OMWA BIBLIA: Omukwenda Paulo athi: “Nomunangabya isinyasi eribugha ndeke-ndeke, nikwa sindi bulha menge.” (2 Abanya Korinto 11:6) Busana n’eriminya ndeke Amasako, Paulo mwabya inianasikire abandi bakamughania. Mwathalighira ebinywe ebithehimba ebya babya bakamubughako bikaleka akayighaya.—2 Abanya Korinto 10:10; 11:5.

YIREBAYE: Ahikwa hano, thahandika iwe ekya wukathoka ndeke.

Neryo hathya thasoborera omubere owuwene owa wuyasiko. (Ng’eky’erileberyako, wukanatsomana abandi? erihithya? wune muyisiwa? eritheya obuthuku?)

2 NGWITHE BULEMWAKI?

Ngoku ekikoba ekighumire kikanathwikira ahagheghire, n’ebibuya ebya wunalhue wuyasiko ndeke ku bikana tsanda bithya wamalighira obulemwa bwawu erikuthabalhako.

EKY’ERILEBERYAKO OMWA BIBLIA: Paulo abya inianasi obulemwa bwiwe. Mwahandika athi: “Ngaligha n’obutseme omughambo wa Nyamuhanga omw’isi w’omuthima waghe, nikwa ngabana owundi mughambo owakakolha omwa mubiri waghe owakalhwa n’omughambo w’obulengekania bwaghe kandi ngayirawa mwa mundu w’omuliki w’omughambo w’ebibi.”—Abanya Roma 7:22, 23.

YIREBAYE: Ni bulemwaki obwa wutholere iwabya iwunemurwanisya?

 3 NGWITHE BILHUBIRIRWAKI?

Wangan’ingira omwa matoka iwabwira omufuyi wuthi akuthimbaye haghumerera erihika aha maghutha akendi hweramu? Obo ini bukiru—kandi in’itsandya sente!

Erisomo? Eribya n’ebilhubirirwa kikakusondolha omwa ngebe kandi ikyaleka iwuthayithimba-thimbako. Wukabya ng’oyunawithe ahakaya kandi iwunasi nga wukendi hikaho wuthi.

EKY’ERILEBERYAKO OMWA BIBLIA: Paulo mwahandika athi: “Ngathibitha ng’oyuwasi eyo akaya.” (1 Abanya Korinto 9:26) Omwakanya k’eriyirekerania omwa ngebe, Paulo mwayihiriraho ebilhubirirwa n’eribikwama-kwamania.—Abanya Filipi 3:12-14.

YIREBAYE: Ahikwa hano handika ebilhubirirwa bisathu ebya wanzire eriberererya omo mwaka owakasa.

4 NI BYAHI EBYA NG’IMANIREKO?

Wamabya iwunayasi ndeke, iwukendibya iwuli ng’omuthi ow’ahandire ndeke emirihi isyanga thera n’omwa kiyagha kinene

Wuthawithe ebya wimanireko, wukabya kange-kange. Ng’akanyalhungu, iwukendi bera eriyihindulikania nuku wulingirirane omwa banywani bawu—ekindu ekikakanganaya ngoku siwuwithe ebyawu ebya wimanireko.

Aliwe, wamabya wunawithe ebya w’imanireko omwa bya wukakolha, siwulibya ng’oyuthayasi—abandi nomubanga kolha eby’embaghane.

EKY’ERILEBERYAKO OMWA BIBLIA: Obundi iniakine mulhwana, omuminyereri Danieli “mwayisunza omwa muthima wiwe” athi akendi theya emighambo ya Nyamuhanga nomwanathwalhawa haali okwa babuthi biwe. (Danieli 1:8) Omw’ikolha ekyo, mwasighalha iniane ngoku atholere eribya. Danieli mwaghendera okwa by’abya imanireko.

YIREBAYE: Ni byahi ebya wimanireko? Ng’eky’erileberyako: Wunikirirye omu Nyamuhanga? Kyamabya ikwakiri kithya, busana naki? Iwe ni kyahi ekikaleka iwaligha ngoku aneyo?

Wunalighire ngoku ebihano bya Nyamuhanga okwa by’esyongeso ni by’erikughasira? Kyamabya ikwa kiri kithya, busana naki?

Wanganza iwabya ngaki oku bino—ekithi ekithoghere ahisi ekikathwalhawa eyi-n’eyi n’omwa kayagha kake kutse omuthi ow’athe angathera n’omwa biyagha ebinene-binene? Wamaghumya ndeke ebya w’imanireko, iwukendibya ng’omuthi oyo. Kandi ekyo kikendi kuwathikya erisubirya okwa kibulyo, Nganayasi?