Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ebibulyo 10 Ebya Balere Bakabulhaya n’eby’Erisubirya

 EKIBULYO 7

Nanga Rwanisya Indi Akahathikano k’Emyatsi y’Engyingo?

Nanga Rwanisya Indi Akahathikano k’Emyatsi y’Engyingo?

EKIKALEKA IKYAKANIBWAKO

Ebya wukathwamu okwa myatsi y’engyingo bikendi syakuhambako kutsibu n’omwa buthuku obukasa.

IWE IWUKENDI KOLHAKI?

Thalengekania oku kino: Harriet amathaghunza mezi abiri masa iniane omwa bunywani na Mike, aliwe akayowa nga banywana kera kera. Bakathumirana esyomeseji obuli kathambi, ibaghunza esyosaha ibane okwa simu, kandi owundi iniaghunzerera ekinywe ekya wundi alyathwa! Aliwe Mike iyo ananzire ibakolha n’ekindi ekilhabire okw’ikania lisa-lisa.

Omwa mezi abiri awamahwa, Mike na Harriet sibali bakolha ekilhabire okw’ithahambangana omwa byalha n’eriwana omwa kikuba. Harriet syanzire bakathasyakolha ekilhabire aho. Aliwe kandi syanzire akaherya Mike. Mike musa yukaleka iniayowa ini mubuya, kandi ini w’embaghane. Harriet iniayibwira omwa muthima athi, ‘Kandi omo kwenene, thwanzene na Mike . . .’

Wamabya iwamabirikulha kandi iwangan’ingira omwa buthethane kandi in’iwe Harriet, iwukendi kolhaki?

THATSUKA ERILENGEKANIA!

Emyatsi y’engyingo ni kihembo ekya Nyamuhanga abiriha abathahenie basa. Erikolha emyatsi eyo isiwuli omwa butheke, ni thundya-thundya ekihembo ekyo. Kiri ng’erimya olhukimba olhuwene olhwa mundu akuha neryo iwalhukolesya ng’ekisanguliryo

Wamagheghena ebilhaghiro eby’omwa buhangwa, ng’eky’akaghalha ke gravity akakakurira ebindu by’ahisi, iwukendi bana bitsibu. Kwa bine bithya wamagheghena ebilhaghiro eby’esyongeso, ng’ekikabugha kithi: ‘Yihighule okwa lhuthetho [“obusingiri,” NW].’—1 Abanya Tesalonika 4:3.

Ni byahi ebyanga lhwiririra omw’ithendighendera okwa kihano ekyo? E Biblia yithi: ‘Omundu oyukasingira akahalhaya okwa mubiri wiwe.’ (1 Abanya Korinto 6:18) Ekyo kyangabya kithi?

 Abakasekulhaya bakabugha bathi eminyethu mingyi eyabirikolha obusingiri yabiribana okwa bitsibu nga bino.

  • ERITUNTURA. Eminyethu mingyi eyabirisingira yikabugha yithi muyayikubya bwomo kyabiribya.

  • ERITHENDI YIKETHERWA. Ababiri bakabya babirisingira, obuli mughuma iniatsuka eriyibulya, ‘Mbwino hane abandi abo abirithakesya nabu?’

  • ERIYITAMWA. Omwa muthima mw’eyo, abasika bakanza oyuwanga batheya, butsira eribakolesya. Kandi abojo abanene bamabirikesya n’omusika sibalithasyamwanza.

  • Ekya wutholere iwaminya: Erikolha emyatsi y’engyingo wuthe omwa butheke, wukayighunza mw’ekitsumbi, omw’ithundya-thundya omubiri wawu. (Abanya Roma 1:24) Omubiri wawu ni w’obughuli okw’ikwama kya ghaba-ghabagho wuthya!

Kanganaya ku wunawithe amaaka aw’erighana obusingiri. (1 Abanya Tesalonika 4:3) Neryo ekiro wasyingira omwa butheke, wukendi syakolha emyatsi y’engyingo. Kandi wukendi syakolhayo isikuli lhukako, ahathe erisaghirira, eriyikubya bwomo, n’eriyilhalikirira—ebighuma okwa bikabya wamasingira.—Emisyo 7:22, 23; 1 Abanya Korinto 7:3.

 WUKALENGEKANAYA WUTHIKI?

  • Omundu oyukwanzire ndeke angananza erikukolhako ebyangaleka iwayowa nabi?

  • Omundu oyukutsomene ndeke angananza erikukolhako ebyangaleka iwatsandya obughuma bwawu na Nyamuhanga?—Abaebrania 13:4.