Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ebibulyo 10 Ebya Balere Bakabulhaya n’eby’Erisubirya

 EKIBULYO 9

Nganalighe Engangirirya y’Ebindu Eriyibuthukira?

Nganalighe Engangirirya y’Ebindu Eriyibuthukira?

EKIKALEKA IKYAKANIBWAKO

Engangirirya eyi yamabya iyihikire, obo engebe isiyiwithe ekighendererwa. Aliwe ebindu byamabya ibyahangikawa, ithukendi yitheghererya ebya thukayibulhaya okwa ngebe n’obuthuku bw’embere.

IWE IWUKENDI KOLHAKI?

Thalengekania oku kino: Alex abiriyibulha. Amakulha inian’ikirirye omu Nyamuhanga kandi ngoku ebindu mubyahangikwa. Aliwe munabwire omusomesya w’ebbayoloje mwakakangiriraya inianemuhathikana athi ebindu bya yibuthukira kandi athi abanya sayansi babirikikakasya ngoku ni kwenene. Alex syanzire akayithwa ng’omudoma. Akayibulhaya athi ‘Abanya sayansi bamabya ibabirikilhangira ikihikire, ningye ndi eribaghania?’

Kuwabya in’iwe Alex, iwunemwendi ligha engangirirya eyi kundi ebitabu bithi yihikire?

THATSUKA ERILENGEKANIA!

Abandu bakabya bakakania okwa kya bakasighika okwa myatsi ibiri eyi, mughulhu mungyi bakabugha ekya bikirirye aliwe isibasi ekikaleka ibakikirirya.

  • Abandi bakikiriraya ngoku ebindu bya hangikawa kundi kya kikakangiriribawa omwa kanisa.

  • Abandi bakikiriraya engangirirya y’ebindi eriyibuthukira kundi kyababirikangiriribwa omwa sukuru.

 EBIBULYO MUKAGHA EBY’ERILENGEKANIAKO

E Biblia yithi: “Obuli nyumba yikahimbawa n’omundu, nikwa Nyamuhanga ni muhimbi w’emyatsi yosi.” (Abaebrania 3:4) Mbwino ekyo kine mw’amenge?

Eribugha wuthi engebe siyiwithe Omuhangiki wayu ikikendi sangalisya ng’eribugha wuthi sihali oyuwahimba enyumba eyi

AMBU: Ebindu byosi byabuthuka omw’iyihutira ly’ekiri nga kindu.

1. Nindi kutse ni kihi ekyaleka ihabya erihuta eryo?

2. Ni kyahi ekyangabya mw’amenge—ekya ebindu eribya ibyayibuthukira kutse ekya ebindu eribya ibinawithe aha byalhua kutse oyuwabiretha?

AMBU: Abandu balhua omwa bisoro.

3. Abandu bamabya ibalhua omwa bisoro—thuthabugha thuthi ng’omwa kibbandu—busana naki obuyitheghererya bw’abandu buli eyighulhu kutsibu okwa bw’ebibbandu?

4. Busana naki n’ehindu hike-hike buyira, engebe yahyo yikathakathenie?

AMBU: Ebindu eriyibuthukira ni kindu ekyabirikakasibwa.

5. Omundu oyukabugha athya ane athayireberya ndeke okwenene kwakyo?

6. Ni bangahi ababirikwama kyaligha engangirirya eyi kundi ambu abandi bandu b’amenge babirilighayo?

“Iwabya iwunemulhaba omwa musithu mw’eyo, neryo iweyayo enyumba eyuwene, iwune mwendi lengekania wuthi: ‘Na bathami! Emithi muyayitherya ndeke yithya yamayikokothya mw’enyumba.’ Isi wangalengekania ekyo! Ekyo isi kyangabya ky’amenge. Neryo ni kyahi ekyangaleka ithwaligha thuthi ebyosi ebiriho byayibuthukira?”—Julia.

“Thalengekania omundu iniakubwira athi ekindu mukyahuta omw’ikolero ly’ebitabu neryo erangyi yamayitsatsanga n’erikolha edikisyonare eyiri mw’obuli kinywe. Iwune mwendi ligha ekyo?”—Gwen.

 BUSANA NAKI IWALIGHA WUTHI NYAMUHANGA ANEYO?

E Biblia yikakuhira mw’omuhwa ow’erikolesya ‘amaaka wawu w’erighanirya.’ (Abanya Roma 12:1, NW) Busana n’ekyo, erikirirya lyawu ngoku Nyamuhanga aneyo isiryakwama kyabya busana

  • N’ERIYOWA (Ngayowa indi hatholere eribya ihane ow’obuthoki bunene)

  • N’ERIGHENDERA OKWA BANDI (Ngikere omwa banya dini)

  • N’ERIKAKWA (Ababuthi baghe mubanza ngikiriraye omu Nyamuhanga—Singabya ngwithe ky’erikolha)

Aliwe, wutholere iwabya iwunawithe esyonzumwa esyuwene esikaleka iwaligha ekya wikirirye.

“Omwa Kilasi, omusomesya akabya anemusoborera ngoku omubiri wethu akakolha, ngalhua ingaligha ngoku Nyamuhanga aneyo. Obuli katsuko k’omubiri kanawithe ekya kakakolha, kandi bikakoleka omwa mubiri mw’eyo isithwasi. Obwongo bwangan’imana wukalengekania ngoku omubiri w’omundu akwikire!”—Teresa.

“Ngabya ingalhangira enyumba nyiri-nyiri, obwathu bunene, kutse ematoka, ngayibulhaya, ‘Nindi oyuwabikolha?’ Ng’eky’erileberyako, ematoka yikayithagha erikolhwa n’omundu w’amenge kundi obuli kandu akali muyo katholere ikabya ahatholere nuku yangakolha. Neryo ematoka eribyaho yamabya iyitholere eribya iyinawithe oyuwakolhayo, obo n’abandu kuthya.”—Richard.

“Nabere nganemwongera eriyitheghererya esayansi, munongera erilhangira amabehi w’engangirirya y’ebindu eriyibuthukira. . . . Okw’ingye, kikayithagha ‘erikirirya’ linene eriligha engangirirya eyi kwilhaba eriligha ku hane Omuhangiki.”—Anthony.

EKY’ERILENGEKANIAKO

Omwa myaka mingyi eya banya sayansi bamathaghunza ibanemusekulya oko mwatsi oyu, sibali bathabana enzoborera eya bosi bakalighiranako. Abanya sayansi ibobene-bene bamathabya isibali lighirana oko mwatsi oyu—kandi ibabatholere eribiminya—iwanamasobya erighania engangirirya eyi?