Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ebibulyo 10 Ebya Balere Bakabulhaya n’eby’Erisubirya

 EKIBULYO 6

Nanga Rwanisya Indi Akahathikano?

Nanga Rwanisya Indi Akahathikano?

EKIKALEKA IKYAKANIBWAKO

Omughulhu wukayithwiramu eky’erikolha, iwukendi sondolha engebe yawu omwakanya k’abandi erikusondolerayo.

IWE IWUKENDI KOLHAKI?

Thalengekania oku kino: Brian akabya akalhangira abalhwana babiri ab’akasoma nabu bakasa eyali, akasa kw’embeho. Bamabiritha lengesya mirundi ibiri omwa wiki eno bakanza erimunywisya ethaba. Obo oyu iniakendibya murundi owakasathu.

Omwojo omughuma akabugha athi:

“Kandi wune iwuwene? Leka ngatha kukangania hano h’omunywani.”

Akabugha ekinywe “omunywani” inianemuyihetha-hetha n’erilhusya omw’isahu mw’ekindu n’eryanza erikiha Brian.

Brian akabya akalhangira ini thaba. Brian akayongera eryasa kw’embeho.

Brian akabugha athi, “Eyihi di. Sinabirikubwira indi sindi . . .”

Owundi mwojo akamubughiramu athi: “Wukasaghaki naa!”

“Ka sihali!” Brian akathunga amani w’eribugha ekyo.

Omwojo oyo akahamba Brian y’okwa bithigho n’erimulemba athi, “iwe imaya.”

Omwojo w’erimbere akaletha ethaba hakuhi n’obunu bwa Brian n’eribugha omwa bihwehwe athi: “Sithwendi thulhagho. Sihali oyukendi syaminya.”

Ku wabya in’iwe Brian, iwukendi kolhaki?

 THATSUKA ERILENGEKANIA!

Abojo abakahathikana Brian aba, kwenene banatsukire erilengekania okwa kya bakakolha? Erithwamu eri nina lyabu? Lyanganabya isiryabu. Erithwalira haghuma, nabu bakabikolha habw’akahathikano k’abandi. Busana n’eryanza erilingirirana omwa bandi, bakaligha abandi abo eribathwiramu eky’erikolha.

Wamayisanga omwa mibere eyiri ng’eyi, iwe iwukendi kolesya mengeki erirwanisya akahathikano?

  1. YIKENGEMERERE

    E Biblia yithi: “Omundu mugherekania amalhangira ebibi akayibisa; Nikwa abakiru bakathwangana ibahuthalha busana nabyo.”—Emisyo 22:3.

    Mughulhu mungyi wangana sangwa walhangira ahangasira obutsibu. Ng’eky’erileberyako, iwalhangira embere ng’erya abawukasoma nabu ibanemunywa ethaba. Omw’ibya iwunayikengemerere ekitsibu, iwukendibya iwunayitheghekire erikirwanisya.

  2. LENGEKANAYA

    E Biblia yithi: “Mubye n’obunyamuthima-thima obuwene.”—1 Petero 3:16.

    Yibulhaye, ‘Ngendi yowa indi enyuma w’aho namaligha erighendera okwa by’abandi?’ Ni kwenene, aha bw’akathambi kake, iwangana tsemesya banywani bawu. Aliwe enyuma w’aho iwukendi yowa wuthi? Iwananza eritsandya erina libuya erya wuwithe busana n’erithanza eritsemesya abawukasoma nabu?—Eriluayo 23:2.

  3. ITHWAMU

    E Biblia yithi: “Omundu w’amenge akubaha.”—Emisyo 14:16.

    Endambi ni ndambi, hakendibya ekikakuyithaghisaya erithwamu, n’eriyimira ebyanga lhwiririramu. E Biblia yikakanaya okwa bandu nga Yozefu, Yobu, na Yesu, abathwamu ndeke. Yikakanaya n’oku Kaina, Esau, na Yuda, abathwamu nabi. Iwe wukendikolhaki?

E Biblia yithi: “Wukole omwa buyisiwa.” (Esyonyimbo 37:3, NW) Wamabya iwabirilengekania okwa byanga lhwiririramu n’eriminya eky’erikolha, eribugha ekya wimanireko ikikendibya kindu kyolho—kandi iwaghasirwa.

Isiwubaha—si bugha ambu wuthanathasoborera buuli abakakuhathikana. Erikwama kya bugha wuthi EYIHI kandi iwunasikire kyangana ghunza. Kutse erikangania ngoku siwangalhua okwa kya wimanireko, iwangana bugha wuthi:

  • “Ingye sindiko!”

  • “Sindikolha ebindu ng’ebyo!”

  • “Ebyaghe ka wunabyasi nanga!”

Ekikulhu ly’erisubirya aho n’aho kandi iwunasikire. Wamakolha ekyo, iwangana sweka wukalhangira abakahathikano bakakukyako!

 ERIRWANISYA AKASEKERERYO

Wamaghendera okwa kahathikano k’abandi, iwukendibya ng’erobboti eya bakasathisaya ngoku bamanza

Kandi ibbwa abandi bamakusekererya? Kandi ibbwa bamabugha bathi, “Hali kibiki—wukabya nga wukasagha-sagha?” Akasekereryo ng’ako nalyo nianza erikukolesya ebithuwene. Wanga subirya wuthiki? Hali bindu nga bibiri.

  • Iwangana ligha ekya bamakwahulhamu. (“Ee, wuhikire, ngasagha!” Neryo iwabugha ekikaleka.)

  • Iwangana musubya kyoko. Bugha ekikaleka iwaghana, neryo mubwire ekyangaleka iniayiswekera. (“Ingye ngalhangira si wusosire erinywa ethaba!”)

Bamalholha embere erikusekererya, yilhuireho! Wibuke, wamasibaho, ikubane mwendyongera bathya erikuhathikana. Omw’iyilhuiraho, wukabya iwamakangania ngoku siwulyanza abandi bakakutsandya.

Omo kwenene, siwanga bisama akahathikano. Aliwe wangana thwamu ekya wanzire erikolha, iwabugha ekya wimanireko, n’erisighalha iwunasikire. Omwa byosi, erithwamu likasighalha eya wuli!—Yosua 24:15.