Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ebibulyo 10 Ebya Balere Bakabulhaya n’eby’Erisubirya

 EKIBULYO 4

Nangakolhaki Namasobya?

Nangakolhaki Namasobya?

EKIKALEKA IKYAKANIBWAKO

Eriligha ebisobyo byawu likendi leka iwabya mundu oyukatsomana n’eribya muyiketherwa.

IWE IWUKENDI KOLHAKI?

Thalengekania oku kino: Tim akabya anemusatha na banywani biwe, akasamba omupira n’erithulha ekiyo ky’eridirisa ly’omutaka.

Kuwabya in’iwe Tim, wanga kolireki?

THATSUKA ERILENGEKANIA!

HALI BINDU BISATHU EBYA WANGAKOLHA:

  1. Erithibitha.

  2. Eritsweba owundi.

  3. Eribwira mwinye ridirisa, n’eriligha erilisubya.

Iwangananza erisombolha ekya A. Aliwe hane ebikaleka ikyabya kibuya eriligha ebisobyo byawu—mbulha n’ithulha eridirisa kutse ekindi kisobyo.

 ESYONZUMWA ISATHU ESYANGALEKA IWALIGHA EBISOBYO BYAWU

  1. Kya kindu ekitholere erikolhwa.

    E Biblia yithi: “Thwanzire eribya b’okwenene omwa myatsi yosi.”—Abaebrania 13:18, NW.

  2. Kutsibu-tsibu abandu bakaghanyira oyukaligha ebisobyo biwe.

    E Biblia yithi: “Oyukakuningira ebibi biwe siendisyuwana; nikwa oyukakangayabyo n’erilekabyo asyabana erighanyirwa.”—Emisyo 28:13.

  3. Ekikulhu kutsibu, kikatsemesaya Nyamuhanga.

    E Biblia yithi: “Abahengemire ni nye okwa Mwami Mukulhu; nikwa obwira bwiwe buli haghuma n’abathunganene.”—Emisyo 3:32.

Karina, ow’emyaka 20, epolisi muyamuha ekibaruha habw’erithibithya ematoka ya kutsibu, amakibisa thatha wiwe. Aliwe mukyaminywa. Karina akabugha athi, “Habere halhaba omwaka mughuma thatha mwabana ekibaruha ekyo ikune erina lyaghe. Ekyo mukyandethera bitsibu binene!”

Erisomo? Karina athi: “Eribisa ebisobyo likakalhaya emyatsi. Endambi yikahika ibyakukulhukako!”

NGOKU WANG’IGHIRA OKWA BISOBYO BYAWU

E Biblia yithi: “Ithwe bosi thukathalha omo bingyi.” (Yakobo 3:2) Kandi ngoku thwabirilhangira, eriligha ebisobyo byawu kandi erikikolha omwa byalhuba, ni kangania ngoku wukayikehaya kandi ngoku wuyitheghererye.

Ekindi eky’erikolha, ly’erighira okwa bisobyo byawu. Omusika oyukahulhawa mwa Vera akabugha athi: “Ngathwalha obuli kisobyo ng’ekindu ekya nangan’ighirako n’erileka libye lisomo eryanga nyiwathikya eribya mundu mubuya n’erilhangira indi ngayihighulha okwa sobya ng’eyo ekindi kiro.” Thuthalebya ngoku wanga kolha ekyo.

Iwaghenda n’eggali ya thatha wawu, iwayithayo. Iwukendi kolhaki?

  • Eriyihunira n’eryanza wuthi thatha wawu isyaminya.

  • Eribwira thatha wawu ekiryabya.

  • Eribwira thatha wawu ekiryabya aliwe iwalhuhira okwa wundi.

Iwawa ebizamu kundi siwathasoma ndeke. Iwukendi kolhaki?

  • Iwayihambulya wuthi bilhue bikalire.

  • Iwaligha ku bulhue bulemwa bwawu.

  • Iwabugha wuthi omusomesya alya kughenderera.

Eribera erilengekania okwa bya wasobaya kera liri ng’erihanda kutsibu ameso w’omwa kayo akakalhangira ebiri enyuma iwunemughendya ematoka

 Hathyanu, thalengekania okwa by’erileberyako ebi, n’eribya nga n’iwe, (1) thatha na (2) musomesya. Thatha wawu n’omusomesya wawu ibakendi kuthwalha bathi wamaligha ebisobyo byawu? Ibakendi kuthwalha bathi wamaswika-swika ebisobyo byawu?

Thalengekania okwa kisobyo ekya wakolha omo mwaka owahwere wanasubirya okwa bibulyo bino.

Kyabya kisobyoki? Muwakolhaki?

  • Munakibisa.

  • Munalhuhira okwa wundi.

  • Munaligha esobya yaghe.

Wamabya imuwuthaligha ekisobyo kyawu, muwayowa wuthi enyuma waho?

  • Ndeke—Sihali oyuwabya aminyire!

  • Nabi—ambi nabugha okwenene.

Ni kyahi ekya wanga kolire erilhangira wuthi ekyo sikibye?

Ni kyahi ekya w’ighira okwa sobya yawu?

WANGA BUGHA WUTHIKI?

Busana naki abandi bandu sibalyanza eriligha ebisobyo byabu?

Abandu banga kulhangira bathi wamabya mundu oyukabera eribisirira ebisobyo, aliwe banga kulhangira bathi wamabya mundu oyukaligha ebisobyo?—Luka 16:10.