Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ebibulyo 10 Ebya Balere Bakabulhaya n’eby’Erisubirya

 EKIBULYO 10

E Biblia Yanga Ngwathikya Yithi?

E Biblia Yanga Ngwathikya Yithi?

EKIKALEKA IKYAKANIBWAKO

E Biblia yikabugha yithi “Amasako wosi Nyamuhanga yuwatheghekanayagho.” (2 Timoteo 3:16) Kwamabya ini kwenene, obo e Biblia iyangana kuha obusondoli obwa wukayithagha.

IWE IWUKENDI KOLHAKI?

Thalengekania oku kino: David anemughendya ematoka kandi okwa biri ah’amahika sihali n’ekighuma eky’asi. Ebyapa n’ebindi biminyikalho okwa nzira bikakanganaya ngoku ey’amaya siyo. David akaminya kw’amathalha. Atholere eribya imwakakithira ahathatholere eyalyasira.

Ku wabya in’iwe David, iwukendi kolhaki?

THATSUKA ERILENGEKANIA!

Ni bingyi ebya wangakolha:

  1. Erisondya ow’eribulya.

  2. Erilebya okwa mapu.

  3. Erilholha embere, iwune n’amaha wuthi obundi wukendi bana enzira.

Nawu wukalhua iwalhangira ekya C isikyanga wathikya kutsibu.

Ekya B kinawithe ku kilengire eky’erimbere. Kundi emapu iwukendibya iwune nayu aho, erikuwathikya eriminya enzira.

Ng’emapu, e Biblia yangana kuwathikya!

Ekitabu ekikaghulibawa kutsibu eki kyangana

  • kusondolha omwa bitsibu byawu

  • kuwathikya eriyiminya n’eribya mundu mubuya

  • kukangania ngoku wangabya n’engebe eyuwene

 ERISUBIRYA EBIBULYO BIKULHU-BIKULHU OMWA NGEBE

Thukabya thukanatsuka eribugha, thukabulhaya ebibulyo.

  • Nindi oyuwakolha olhubulha?

  • Esyongununu sikolirwe omuki?

Thukabya thwabiri kulha ithwatsuka eriyibulya okwa bikathubyako.

Kandi ibbwa kyamathabya indi eby’erisubirya bithulha ibine omwa Biblia?

Abangyi bakabugha bathi e Biblia yiri mw’ebinyambwirwa n’esyongano buyira, bathi ni kitabu ekyabirihwa okwa buthuku, kutse bathi yikalire eriyitheghererya. Aliriryo ibbwa, mbwino e Biblia ku yine yithya, kutse w’amalengekania agho abandu bawithe kuyo? Mbwino babirithebwa?

Ng’eky’erileberyako, abandu basi bathi e Biblia yikabugha yithi Nyamuhanga yukathabalha ekihugho. Eki ikyanabya ini kwenene? Ekihugho kyabiritsandira ighuma! Muli obulhumi n’eryaghalhwa, amalhwere n’olhuholho, obunakwa n’ebitsinduli. Nyamuhanga w’olhwanzo angaby’athi iyukaleka ebyosi ebi ibyabya?

Wunanzire iwaminya eky’erisubirya? Ekya Biblia yikabugha okwa yukathabalha ekihugho kyangana kuswekya!

Wanganabya iwamabirilhangira ngoku amenge aw’akahebawa omwa katabu kano aseghemere okwa Biblia. Abema ba Yehova babiriligha ndeke-ndeke ngoku e Biblia yiri mw’obusondoli obukawathikaya. Kiri kithya kusangwa ‘yatheghekanibawa na Nyamuhanga kandi yiri n’endundi busana n’erikangirirya omwatsi w’ekwenene, kandi busana n’erikunga erihaba, kandi busana n’erihabulha.’ (2 Timoteo 3:16, 17) N’ithwamu lyawu erisoma ekitabu ekyahandikawa kera eki—ekithehwa okwa buthuku!