Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Amasomo Agho Wang’igha Okwa by’Omwa Biblia

 ERISOMO 55

Omumalaika wa Yehova Mwatheya Hezekia

Omumalaika wa Yehova Mwatheya Hezekia

Obuthabali bwe Asuria bwabya ibwabirihamba ebihanda ikumi by’Obwami bwe Israeli. Neryo Senakaribu, omwami we Asuria mwanza erihamba n’ebihanda bibiri by’obwami bwe Yuda. Mwatsuka erihamba emiyi ye Yuda mwa mughuma-mughuma. Aliwe abya anzire kutsibu omuyi we Yerusalemu. Ekya Senakaribu abya isyasi, Yehova abya iniane mutheya e Yerusalemu.

Hezekia, omwami we Yuda, mwathuha Senakaribu y’esyosente nuku aleke e Yerusalemu. Nomwakine indi Senakaribu mwimya esyosente esyo, mwathaleka erithuma amahe wiwe awakalire erihamba e Yerusalemu. Abandu ababya omwa muyi mubakwa buba kundi Abaasuria babya ibakayahika hakuhi n’omuyi. Neryo Hezekia mwababwira athi: ‘Simubahe. Abaasuria bawithe amani aliwe Yehova akendi thuha amani manene kwilhaba ibo.’

Senakaribu mwathuma omukwenda wiwe, ya Rabsake, erisyasekererya abandu. Rabsake mwimana eyihya w’omuyi n’erilhaka athi: ‘Yehova syendi bawathikya. Simulighire Hezekia eribathebya. Sihali nyamuhanga oyuwanga batheya okw’ithwe.’

Hezekia mwabulya Yehova ng’akole kyahi. Yehova mwasubirya athi: ‘Siwukwe buba busana n’ebya Rabsake akabugha. Senakaribu syendi hamba e Yerusalemu.’ Enyuma waho, Hezekia mwabana esyobaruha erilhua oku Senakaribu. Omwa syobaruha imuli bino: ‘Bikyeko. Yehova syendi kuwathikya.’ Hezekia mwasaba athi: ‘Kisi, Yehova, thulhamaye, nuku obuli mundu angaminya ngoku wuli Nyamuhanga w’okwenene.’ Yehova mwamubwira athi: ‘Omwami we Suria syendi asa e Yerusalemu. Ngendi theya omuyi waghe.’

Senakaribu iniakayowa athi e Yerusalemu yikendibya yiwe. Neryo omwa kiro omo, Yehova mwathuma  omumalaika aho abasirikali babya bakakesya eyihya w’omuyi. Omumalaika mwitha abasirikali 185,000! Omwami Senakaribu mwaherya abasirikali biwe ab’akaghalha. Habya isihakiri eky’erikolha aliwe mwasuba ewiwe iniabirisingwa. Yehova mwatheya Hezekia ne Yerusalemu ngoku abya iniabiriyilhagha. Ku wabya iwune e Yerusalemu, wangana yikethere Yehova?

“Omumalaika w’Omwami Mukulhu akatheghaya abakamubaha, akalhamayabo omo bwiko.”​—Esyonyimbo 34:7