Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Amasomo Agho Wang’igha Okwa by’Omwa Biblia

 ERISOMO 47

Yehova Mwaghumya Eliya

Yehova Mwaghumya Eliya

Yezebeli mwowa okwa kyahika okwa baminyereri ba Baali, neryo mwahithana kutsibu. Mwathuma omwatsi oku Eliya athi: ‘Omungya wukendibya kinda ng’abaminyereri ba Baali.’ Eliya mwakwa obuha neryo mwathibitha omo mbwarara. Mwasaba athi: ‘Yehova, bingaho. Leka ngahole.’ Iniabirilhuha kutsibu, Eliya mwaghotsera omw’isi sy’omuthi.

Omumalaika mwamubukya n’erimubwira athi: ‘Hangana wulye.’ Eliya mwalhangira omuggati owokirye okwa makalha n’ekisya ky’amaghetse. Mwalya n’erinywa neryo amathasyaghotsera. Kandi omumalaika mwathasyamubukya kandi n’eribugha athi: ‘Wulye. Wukayithagha akaghalha busana n’olhughendo lhwawu.’ Neryo Eliya kandi mwalya. Neryo mwaghenda ahabw’ebiro 40 n’emisibo 40, erihika okwa Kithwe Horebu. Eyo Eliya mwaya omo mwangalhu mwaghotsera. Aliwe Yehova mwakania nayu. Mwabugha athi: ‘Wukakolha hano haki, Eliya?’ Eliya mwasubirya athi: ‘Abaisraeli babirisighania endaghane yawu. Mubathoghothya ebiherero byawu n’eritha abaminyereri bawu. Neryo bakanza erinyitha.’

Yehova mwamubwira athi: ‘Ghenda wimane okwa kithwe.’ Erimbere, ekiyagha kinene mukyahitha ahali omwangalhu. Enyuma waho, omusiki mwalhaba, kwamakwama n’omuliro. Erighunzerera, Eliya mwowa omulenge muke owahehere. Mwaswika obusu bwiwe omwa syongyimba siwe neryo amimana okwa lhukyo lhw’omwangalhu. Neryo aho Yehova mwamubulya ekyaleka iniathibitha. Eliya mwasubirya athi: ‘Ningye ingyuwene nabirisighalha.’ Aliwe Yehova mwamubwira athi: ‘Siwuli iwuwene. Hakine Abaisraeli 7,000 abakinanyiramaya. Ghenda wuhakabaye Elisa mwa muminyereri omo mwanya wawu.’ Aho n’aho, Eliya mwayakolha ngoku Yehova anamubwira. Wukalengekanaya Yehova anemwendi kuwathikya wamakolha eby’akanza wukole? Ee, ahathe erithika-thika. Thusube enyuma okwa buthuku bw’ekyanda thwanalebya ekyabya omwa buthuku obo.

“Simuhanga-hangaye emithima yenyu, nikwa omwa buli mwatsi mubwire Nyamuhanga obwagha bwenyu, imukasaba n’erimuhathikana, imune muha n’ewasingya.”​—Abanya Filipi 4:6