Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Amasomo Agho Wang’igha Okwa by’Omwa Biblia

 ERISOMO 45

Obwami Bukayighaba

Obwami Bukayighaba

Obuthuku Solomona abya akaramya Yehova, e Israeli yabya obuholho bunene. Aliwe Solomona mwathahya abakali bangyi ab’ebindi bihanda, kandi abakali aba ibakaramaya esyosanamu. Lyolho-lyolho, Solomona mwahinduka, nayu amatsuka eriramya esyosanamu. Eki mukyahithania Yehova. Mwabwira Solomona athi: ‘E Israeli yikendi saghulhwa okw’eka yawu kandi iyaghabwa kabiri. Ngend’iha ekitsweka ekinene oko mughuma w’okwa baghombe bawu, n’eka yawu yikendi syathabalha ekitsweka ekike kutsibu.’

Yehova mwakangania erithwamu liwe ndeke-ndeke omwa yindi nzira. Omughuma w’okwa baghombe ba Solomona iya Yeroboamu abya inianemughenda omwa nzira omughulhu asangana omuminyereri Ahiya. Ahiya mwasathangya esyongyimba siwe mwa bihandi 12 n’eribwira Yeroboamu athi: ‘Yehova akendi saghulha obwami bwe Israeli okw’eka ya Solomona n’eribughaba kabiri. Imaya ebihandi ikumi ebi kundi wukendi syabya mwami oku bihanda ikumi.’ Omwami Solomona mwowa omwatsi oyu neryo amanza eritha Yeroboamu! Neryo Yeroboamu mwathibitha e Misiri. Enyuma waho, Solomona mwaholha neryo mughalha wiwe iya Rehoboamu amabya mwami. Neryo Yeroboamu mwayowa athi kyuwene erisuba e Israeli.

 Abakulhu be Israeli mubabwira Rehoboamu bathi: ‘Wamathwalha abandu ba ndeke, ibakendi kusighika.’ Aliwe abanywani ba Rehoboamu mubamubwira bathi: ‘Wutholere iwakalha kutsibu okwa bandu! Iwabakolesya kutsibu!’ Rehoboamu mwakwama erihabulha ly’abanywani biwe. Mwakalha okwa bandu neryo bamayisamambulha. Mubayira Yeroboamu mo mwami w’ebihanda ikumi, ebya hulhawa mo bwami bwe Israeli. Ebindi bihanda bibiri mubyahulhwa mwa bwami bwe Yuda, kandi mubabya bathaleghulha oku Rehoboamu. Neryo ebihanda 12 bye Israeli mubyayighaba.

Yeroboamu mwathanza abandu biwe bakayaramirya e Yerusalemu, eyabya omo bwami bwa Rehoboamu. Wunasi nga ni busana naki? Yeroboamu abya akwire obuba athi bangana musighania ibatsuka erisighika Rehoboamu. Neryo mwakolha ebyana bibiri by’esyonde n’eribwira abandu athi: ‘E Yerusalemu yiri hali kutsibu. Mwanganaramirya hano.’ Abandu mubatsuka eriramya ebyana by’esyonde neryo kandi bamibirirwa Yehova.

“Simumathikane n’abathikirirye. Kusangwa ekithunganene kyanga sangira kithi n’ekibi kwehi? . . . Kutse oyuwikirirye angana sangira haghuma n’oyuthikirirye kwehi?”​—2 Abanya Korinto 6:14, 15