Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Amasomo Agho Wang’igha Okwa by’Omwa Biblia

 ERISOMO 44

Ehekalu ya Yehova

Ehekalu ya Yehova

Solomona abere abiribya mwami we Israeli, Yehova mwamubulya athi: ‘Wanzire ingakuhaki?’ Solomona mwasubirya athi: ‘Ngakine mulere, kandi singasi ekya nanga kolha. Kisi wunyihe amenge aw’erisondolha abandu bawu.’ Yehova mwabugha athi: ‘Kundi wabirisaba amenge, ngendikuyira mw’ow’amenge omwa kihugho. Kandi ngendi kuyira mwa mughuda kutsibu. Kandi wamanyowa, iwukendi syabyaho ebiro binene.’

Solomona mwatsuka erihimba ehekalu. Mwakolesya ehoro n’efeza, emithi, n’amabwe, ebyosi ibyuwene kutsibu. Esyongumi sy’abalhume n’abakali abasi ndeke erihimba babakolera okwa hekalu. Enyuma w’emyaka musanju, ehekalu yabya iyamabirihwa eritholere erihebwayo oku Yehova. Yabya mw’ekiherero, ekyabya kikahererwako obuhere. Solomona mwakukama embere sy’ekiherero n’erisaba athi: ‘Yehova, ehekalu eno si nene kutsibu kandi siyuwene kutsibu embere syawu, aliwe kisi ligha eriramya n’erisaba lyethu.’ Yehova mwalengekania athiki okwa hekalu n’omusabe wa Solomona? Solomona abere akanaghunza erisaba, omuliro mwalhua omwa lhubulha mwahisya obuhere obwabya okwa kiherero. Eki mukyakangania ngoku Yehova amaligha ehekalu. Abaisraeli babere bakalhangira eki mubatsema kutsibu.

Omwami Solomona mwaminywa omwa Israeli yosi busana n’amenge wiwe nibya n’omwa bitsweka by’ehali. Abandu ibakasa eyiri Solomona eribawathikya okwa bitsibu byabu. Nibya n’Omwami-kali we Seba mwasa akasamulengako omw’ibulya ebibulyo ebikalire. Abere akowa erisubirya liwe, mwabugha athi: ‘Munathaligha eby’abandu babya bakambwira okw’iwe, aliwe lino namaligha ngoku nibya wuwithe amenge manene kwilhaba n’ebya bandu babya bakabugha. Nyamuhanga wawu, Yehova, abirikutsumulha.’ Ekihanda kye Israeli kyabya omwa ngebe eyuwene kandi n’abandu babya batsemire. Aliwe emyatsi yabya iyikayahinduka.

“Lebaya! Oyulengire Solomona ane hano.”​—Matayo 12:42