Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Amasomo Agho Wang’igha Okwa by’Omwa Biblia

 ERISOMO 49

Omwami-kali Mubi Akasuyirawa

Omwami-kali Mubi Akasuyirawa

Omwami Ahabu mwaleberya omw’idirisa ly’omwa kikali kiwe e Yezreeli, amalhangira eririma ly’omulhume oyukahulhawa mwa Naboti. Ahabu mwanza eririma eryo neryo mwalengaho erianza erighulhalyo oku Naboti. Aliwe Naboti mwaghana kundi omwa Mighambo ya Yehova sikyabya kitholere erighulya eririma ly’omwandu. Mbwino Ahabu mwanasikya Naboti busana n’erikolha ekihikire? Eyihi. Ahabu mwahithana kutsibu. Mwahithana kutsibu isyanga thoka n’erilhua ekathi kiwe kandi mwaghana n’erirya.

Mukali wa Ahabu, Omwami-kali mubi iya Yezebeli mwabwira Ahabu athi: ‘Wuli mwami we Israeli. Wangan’imya ekyosi-kyosi ekya wanzire. Eririma eryo ngendi kwimiryalyo.’ Mwahandikira abakulhu b’omuyi, mwababwira athi bahandikirire Naboti busana n’eritsuma Nyamuhanga kandi athi bamwithe omo mabwe. Abakulhu mubakolha ekya Yezebeli ababwira erikolha, neryo Yezebeli mwabwira Ahabu athi: ‘Naboti abiriholha. Eririma ni ryawu.’

Naboti siyo musa oyo Yezebeli ithira bbule. Mwitha abandu banene ababya banzire Yehova. Iniakaramaya esyosanamu kandi mwakolha ebindi bindu ebibi. Yehova mwalhangira ebindu byosi ebibi ebya Yezebeli akolha. Yehova angamukolereki?

Ahabu abere abiriholha, mughalha wiwe Yehoramu mwabya mwami. Yehova mwathuma omulhume oyukahulhawa mwa Yehu eriyasuyira Yezebeli n’eka yiwe.

Yehu mwaghendya eggali yiwe eriya e Yezreeli eyo Yezebeli abya ikere. Yehoramu mwasa okwa ggali yiwe eribandana na Yehu neryo mwamubulya athi: ‘Nina buholho?’ Yehu mwabugha athi: ‘Sihangabya obuholho, mama wawu Yezebeli amabya anemukolha ebibi.’ Yehoramu mwabindulha eggali yiwe n’erilhuaho. Aliwe Yehu mwatsimitha Yehoramu y’omwithumo neryo amaholha.

 Neryo Yehu mwaya omwa kikali kya Yezebeli. Yezebeli abere akowa ngoku anemwasa, mwayipamba, mwakolha esyonzwiri siwe, neryo mwayamulinda omwa kisenge ky’eyighulhu n’eribya inianasamalire omw’idirisa. Yehu abere akahika, Yezebeli mwamuramukya isyatsomene. Yehu mwapurira abaghombe ba Yezebeli ababya bimene hakuhi nayu athi: “Mumughuse eyihya!” Mubasukuma Yezebeli omw’idirisa, neryo mwathoghera okwa kithaka n’eriholha.

N’enyuma waho, Yehu mwitha abaghalha ba Ahabu 70 n’erilhusya eriramya lya Baali omwa kihugho. Wanamalhangira ngoku Yehova akalhangira obuli kindu kandi ngoku okwa buthuku obutholere, akasuyira abakakolha ebibi?

“Omwandu akabanika lhuba okw’itsuka, nikwa enduli yagho siyendi syatsumulhwa.”​—Emisyo 20:21