Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Amasomo Agho Wang’igha Okwa by’Omwa Biblia

 ERISOMO 39

Omwami we Israeli ow’Erimbere

Omwami we Israeli ow’Erimbere

Yehova abya iniabiriha Abaisraeli ba batsweri abanga basondolha, aliwe mubanza erithunga omwami. Mubabwira Samweli bathi: ‘Ebihanda byosi ebithuthimbireko binawithe abami. Nethu thukanza owethu.’ Samweli mwayowa isikihikire, neryo mwasaba Yehova busana n’ekyo. Yehova mwamubwira athi: ‘Abandu siwe bakaghana. Ningye bakaghana. Babwire wuthi bangana thunga omwami aliwe omwami oyo akendi basaba bingyi.’ Nomubyanabya bithya, abandu mubabugha bathi: ‘Ekyo siki. Ithwe thukanza omwami!’

Yehova mwabwira Samweli athi omulhume oyukahulhawa mwa Saulo yukendibya mwami w’erimbere. Omughulhu Saulo ayale- baya Samweli e Rama, Samweli mwahakabya Saulo ng’omwami akutha okwa muthwe wiwe kw’amaghutha.

Enyuma waho, Samweli mwahindania Abaisraeli bo haghuma eribakangania omwami wabu omuhyaka. Aliwe mubathabana Saulo. Wunasi nga ni habwaki? Kundi abya iniabiribisama omwa misiko. Erighunzerera babere bamubana mubamuletha n’erimwimania omwa kathi-kathi k’abandu abosi. Saulo abya muuli okwa bandu abosi kandi ini mubuya okwa mubiri. Samweli mwabugha athi: ‘Mulebaye oyo Yehova abiribasombolera.’ Abandu mubabugha omwa mulenge munene bathi: ‘Omwami akothe!’

Okw’itsuka, Omwami Saulo mwahulikirira Samweli n’eriowa Yehova. Aliwe mwahinduka. Ng’eky’erileberyako, Saulo syabya atholere eriha obuhere. Samweli omuminyereri wa Yehova abya iniabirimubwira athi amulinde. Aliwe Samweli mwathasa lhuba. Neryo Saulo mwayithwiramu eriha obuhere. Samweli mwayowa athi? Mwamubwira athi: ‘Wulhue wutholere iwowa Yehova.’ Mbwino Saulo mwan’ighira okwa kisobyo kiwe?

Enyuma waho, Saulo abere akayalhwa n’Abamaleki, Samweli mwamubwira athi isyalhamaya mundu na mughuma. Aliwe Saulo  mwathwamu erithendi itha Omwami Agagi. Yehova mwabwira Samweli: ‘Saulo abirinyisighania, kandi syali nyihulikirira.’ Samweli mwahithana kutsibu, n’eribwira Saulo athi: ‘Kundi wabirighana eriowa Yehova akendi sombolha owundi mwami.’ Samweli abere akabinduka akaghenda, Saulo mwahamba omusike w’ekanzu ya Samweli neryo yamasathika. Neryo Samweli mwabwira Saulo athi: ‘Yehova amabirikulhusyako obwami.’ Yehova abya iniakayaha obwami b’owundi mundu oyuwanga mwanza n’erimwowa.

“Eriowa lyuwene kwilhaba amahere.”​—1 Samweli 15:22