Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Amasomo Agho Wang’igha Okwa by’Omwa Biblia

 ERISOMO 41

Dawudi na Saulo

Dawudi na Saulo

Dawudi mwabya abir’itha Goliata, Omwami Saulo mwamukolha mwa mukulhu w’amahe wiwe. Dawudi mwasingura amalhwa mangyi, kandi mwaminywa kutsibu. Dawudi iniakabya akasuba ewabu akalhua okwa lhuhi, abakali ibakasyamuthangirira ibane muhotholha n’er’imba bathi: ‘Saulo abir’itha esyongumi, na Dawudi abir’itha amakumi w’esyongumi!’ Saulo mwahithana oku Dawudi kandi mwanza n’erimw’itha.

Dawudi iniakawatha ndeke enanga. Kiro kighuma Dawudi iniane muwathira Saulo y’enanga, omwami Saulo mwamughusa kw’erithumo. Dawudi mwarikyanga, neryo erithumo mulyatsimitha ekidongo. Enyuma w’aho, Saulo mwalengesya eyindi mirundi mingyi er’itha Dawudi. Erighunzerera, Dawudi mwathibitha amayabisama omo mbwarara.

Saulo mwimya abasirikali biwe 3,000 bamayasondya Dawudi. Mwayingira omo mwangalhu owa Dawudi n’abalhume biwe babya babisememo. Abalhume ba Dawudi  mubabugha na Dawudi omwa bihwehwe bathi: ‘Wamayibanira akaghisa k’eritha Saulo.’ Dawudi mwasoba amayasara okwa kanzu y’Omwami Saulo. Saulo mwathaminya. Enyuma w’aho, Dawudi mwayowa nabi athi syathakangania erisikya oko muhakabibwa wa Yehova. Mwathalighira abalhume biwe bakalhwa na Saulo. Nibya Dawudi abere abirilhua omo mwangalhu oyo, mwabirikira oku Saulo, n’eribugha athi analyendibya iniabirimw’itha omughulhu alyabana akaghisa. Mbwino Saulo anganahindwire amalengekania wiwe oku Dawudi?

Eyihi. Saulo mwalholha embere erihigha Dawudi. Kiro kighuma omwa kiro, Dawudi na muhwa wiwe Abisai mub’ombombera omwa kambu ya Saulo. Nibya na Abineri, omutheya wa Saulo abya iniabirighotsera. Abisai mwabugha athi: ‘Aka ni kaghisa kethu! Leka ngamwithe.’ Dawudi mwasubirya athi: ‘Yehova yukendi sy’itha Saulo. Aliwe leka thuheke erithumo liwe n’akasya kiwe k’amaghetse thuyighendere.’

Dawudi mwahethukira okwa kithwe ekiri hakuhi kandi ekisamalirene n’ekambu ya Saulo. N’eribirikira athi: ‘Abineri, busana naki siwuthatheya omwami wawu? Erithumo n’akasya ka Saulo biri hayi?’ Saulo mwaminyerera omulenge wa Dawudi n’eribugha athi: ‘Wangabere iwabirinyitha, aliwe muwuthethanyitha. Nganasi ngoku niwe wukendi thasyabya mwami we Israeli.’ Saulo mwasuba omwa kikali kiwe. Aliwe si bugha ambu obuli mundu omw’eka ya Saulo abya aponire Dawudi.

“Kyamathokekana, okwa lhuhandi lhwenyu, mubye n’obuholho oko bandu bosi. Abanze, simuyikisaye, nikwa muleke erihithana lya Nyamuhanga likole.”​—Abanya Roma 12:18, 19