Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Amasomo Agho Wang’igha Okwa by’Omwa Biblia

 ERISOMO 43

Erilholho ly’Omwami Dawudi

Erilholho ly’Omwami Dawudi

Saulo abere abiriholha, Dawudi mwabya mwami. Dawudi aby’awithe myaka 30. Habere habirilhaba myaka mirebe iniane mwami, erigholho-gholho lighuma iniane okwa lhuthwe lhw’ekikali kiwe, mwalhangira omukali oyuwene. Dawudi mwakiminya ngoku omukali oyo n’iyo Batiseba kandi ni mukali w’omusirikali, iya Uria. Dawudi mwathumira oku Batiseba eryasa omwa kikali kiwe. Mwakesya nayu, neryo mwabya mukule. Dawudi mwalengaho eribisirira eky’akolire. Mwabwira omukulhu w’amahe wiwe athi ahire Uria y’embere omwa malhwa kandi amulekeranaye. Uria abere abir’ithibwa, Dawudi mwathahya Batiseba.

Aliwe Yehova abya inianalhangire ebyosi ebyabya. Angakolireki? Yehova mwathuma omuminyereri Natana oku Dawudi. Natana mwabugha athi: ‘Habya omugaga oyuwithe esyombuli nyingyi, n’omunakwa oyuwabya withe embuli nguma nyisa eyo aby’anzire kutsibu. Omugaga mwimya embuli nguma ey’omunakwa eyo.’ Dawudi mwahithana kutsibu n’eribugha athi: ‘Omugaga oyo atholere iniakwa!’ Neryo Natana mwabwira Dawudi athi: ‘Niwe mugaga oyo!’ Dawudi mwahwa amani, n’eribwira Natana athi: ‘Nabirihalya oku Yehova.’ Erilholho eri mulyalethera Dawudi y’ebitsibu n’okwa b’eka yiwe. Yehova mwasuyira Dawudi aliwe mwathamwitha kundi Dawudi abya mw’okwenene kandi iniayikehirye.

Dawudi mwanza erihimba ehekalu ya Yehova, aliwe Yehova mwasombolha mughalha wa Dawudi ya Solomona erihimbayo. Dawudi  mwatsuka erisonderya Solomona y’ebindu n’eribugha athi: ‘Ehekalu ya Yehova yitholere iyuwana kutsibu. Solomona akine mulere, aliwe ngendi muwathikya omw’itheghekania ebindu eby’erihimbamo.’ Dawudi mwahayo esyosente siwe erisighika omubiiri w’obuhimbe. Mwasondya abahimbi abasi ndeke. Mwasorokya ehoro n’efeza, kandi mwalhangira athi emithi y’emierezi yikalhua e Tiro ne Sidoni. Abere iniakisiya iniaholha, Dawudi mwaha Solomona y’epulani ey’erihimba ehekalu. Mwabugha athi: ‘Yehova mwabugha athi ngakuhandikire emyatsi eyi. Yehova akendi kuwathikya. Siwubahe. Wusike, wutsuke omubiiri.’

“Oyukakuningira ebibi biwe syendi syuwana, nikwa oyukakangayabyo n’erilekabyo asyabana erighanyirwa.”​—Emisyo 28:13