Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Amasomo Agho Wang’igha Okwa by’Omwa Biblia

 ERISOMO 36

Eriyilhagha lya Yefuta

Eriyilhagha lya Yefuta

Abaisraeli kandi mubasighania Yehova bamatsuka eriramya esyonyamuhanga sy’amabehi. Omughulhu Abaamoni bathahirira Abaisraeli n’erilhwa nabu, esyonyamuhanga syabu sy’amabehi musithabawathikya. Abaisraeli mubanuba habw’emyaka mingyi. Erighunzerera mubabwira Yehova bathi: ‘Thwabirihalya. Kisi wuthulhamaye okwa syonzighu syethu.’ Abaisraeli mubabunzungulha esyosanamu syabu n’erithasyatsuka eriramya Yehova kandi. Yehova mwathanza bakalholha embere ibanemunuba.

Omulhwi oyukahulhawa mwa Yefuta mwasombolhwa erisondolha Abaisraeli bakalhwa n’Abaamoni. Yefuta mwabwira Yehova athi: ‘Wamathuwathikya erisingura amalhwa aya,  ngakulhaghanisaya indi omughulhu nasyasubulha, ngendi syakuha omundu oyukendi syatsuka erilhua omwa nyumba yaghe erisyanyithangirira.’ Yehova mwahulikirira erisaba lya Yefuta neryo amamuwathikya erisingura amalhwa.

Yefuta abere akasuba eka, omundu oyuwatsuka erisyamuthangirira abya ini mwali wiwe, omwana wiwe mughuma musa. Abya inianemuhotholha n’eriwatha akaghoma. Yefuta angakolireki? Mwibuka omulhaghe wiwe neryo amabugha athi: ‘Ilholho, mwali waghe! Wamanyitha obulighe. Munayilhagha oku Yehova. Eriberererya eriyilhagha lyaghe, ngatholere erikuthwalha eyiri ehema e Silo eriyakolerayo.’ Aliwe mwali wiwe mwamusubirya athi: ‘Thatha, wamabya imuwalhaghanisya Yehova, wutholere iwaberererya eriyilhagha lyawu. Aliwe wunyilighire erighenda okwa kithwe myezi ibiri n’abanywani baghe. Neryo ngendi ghenda eyiri ehema.’ Buthaleghulha, mwali wa Yefuta mwakolera Yehova eyiri ehema omwa ngebe yiwe yosi. Obuli mwaka, banywani biwe ibakaghenda e Silo bakayamulebya.

“Oyuwanzire mughalha kutse mwali kwilhaba ingye syanyitholere.”​—Matayo 10:37