Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Amasomo Agho Wang’igha Okwa by’Omwa Biblia

 ERISOMO 23

Erilhaghanisya Yehova

Erilhaghanisya Yehova

Emyezi ng’ibiri Abaisraeli balilhuire e Misiri, mubahika okwa Kithwe Sinai, neryo bamapanga aho. Yehova mwabirikira Musa, oyuwahethukira okwa kithwe, neryo amamubwira athi: ‘Munalhamirye Abaisraeli. Bamanyowa n’erikenga ebilhaghiro byaghe, ibakendi syabya basombolhwa baghe.’ Musa mwakima okwa kithwe amayabwira Abaisraeli ebya Yehova amabugha. Mubasubirya bathiki? Bathi: ‘Thwasyakolha ebyosi ebya Yehova akabugha athi thukole.’

Musa kandi mwasuba okwa kithwe. Eyo, Yehova mwabugha athi: ‘Omo biro bisathu, ngendi kania nawu. Wuhane abandu wuthi isibasa okwa Kithwe Sinai.’ Musa mwakima amasyabwira Abaisraeli athi bayithegheke eriowa Yehova akakania nabu.

Okwa kiro kyakasathu, Abaisraeli mubalhangira ehirabyo n’ekithu ekikinire okwa kithwe. Mubowa n’omulhumo munene n’omulenge w’engubi. Neryo Yehova mwakimira okwa kithwa omwa muliro. Abaisraeli mubakwa obuba bunene indi mubathithimana. Omusiki munene mwasuka-sukania ekithwe ekyosi n’omuki amakiswika. Omulenge w’engubi mwongera erikanya kutsibu. Neryo Nyamuhanga mwabugha athi: ‘Indi Yehova. Isimwaramaya esindi nyamuhanga.’

Musa mwasuba okwa kithwe, neryo Yehova amamuha emighambo kutse ebilhaghiro eby’eriha abandu ebikakanganaya ngoku banga ramya Nyamuhanga kandi ngoku banga yithwalha. Musa mwahandika ebilhaghiro ebyo, amabisomera Abaisraeli. Mubayilhagha bathi: ‘Thukendi kolha ebyosi ebya Yehova akabugha athi thukole.’ Kwenene, mubalhaghanisya Nyamuhanga. Aliwe bangana berereryeryo?

‘Wanze Yehova Nyamuhanga wawu n’omuthima wawu wosi, n’engebe yawu yosi, n’obulengekania bwawu bwosi.’​—Matayo 22:37