Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Amasomo Agho Wang’igha Okwa by’Omwa Biblia

 ERISOMO 20

Ebindi Bihunzo Mukagha

Ebindi Bihunzo Mukagha

Musa na Haruni mubakolya oku Farao kw’omwatsi wa Nyamuhanga bathi: ‘Wamathendileka abandu baghe bakaghenda, nasyathuma esisuki ehosi.’ Ebiyuki ebyo ibikalhuma abandu. Ebiyuki binene kutsibu mubyingira omwa manyumba w’Abanya Misiri, aw’abagaga n’abanakwa. Mubyusulha omwa kihugho ekyo ekyosi. Aliwe omwa kihugho kya Goseni, eyabya yikere Abaisaeli, sibyabyayo. Eritsuka-tsukana n’ekihunzo kyakani eki, ebihunzo ibikahika okwa Banya Misiri basa. Farao mwasaba athi: ‘Mulembe-lembe Yehova athulhusaye kw’esisuki esi. Abandu benyu bakendi ghenda.’ Aliwe Yehova abere abirilhusyaho ebiyuki ebyo, Farao mwahindulha amalengekania wiwe. Mbwino Farao angan’ighire erisomo?

Yehova mwabugha athi: ‘Farao amathendi leka abandu baghe bakaghenda, ebisoro by’Abanya Misiri ibikendi lhwalha n’eriholha.’ Ekiro ekyakwamako, ebisoro mubyatsuka eriholha, aliwe ebisoro by’Abaisraeli mubithaholha. Nomwabine, Farao mwakalya omuthima, amaghanira abandu ba Nyamuhanga.

Neryo Yehova mwabwira Musa athi asube eyiri Farao, anaghusa eribu ly’omwa kyanya. Eribu eryo mulyabya engungu nene eyabya yikikira okwa Banya Misiri abosi. Engungu eyo muyalhasya okwa Banya Misiri abosi n’ebisoro byabu byosi kw’ebimatha ebikalhuma. Aliwe nomubyanabya bithya, Farao mwaghanira Abaisraeli.

Yehova mwasubya Musa eyiri Farao n’omwatsi  ono: ‘Wukinaghanire erileka abandu baghe baghende? Omungya amathwa akendi syawa okwa kihugho kyosi kye Misiri.’ Bwabere bwakya, Yehova mwathuma amathwa, eripura ly’obuthuku, n’omuliro. Ky’ekihunzo ekikalire ekya Banya Misiri babya ibamathabana. Ebirimwa ebyosi mubyathingithibwa, aliwe butsira eby’abo ababya e Goseni. Farao mwabugha athi: ‘Mulembe-lembe Yehova imanaye eki! Neryo mukendi ghenda.’ Aliwe amathwa n’embulha byabere byanaleka eriwa, Farao mwahindulha amalengekania.

Neryo Musa mwabugha athi: ‘Ibbwa esyongyike sikend’irya ebirimwa ebyosi ebya sighalha okwa byatsandibawa n’amathwa.’ Esyongyike nene kutsibu musyalya obuli kithi ekya sighalha omwa malima n’okwa mithi. Farao mwasaba athi: ‘Mulembe-lembe Yehova alhusayeho esyongyike esi.’ Aliwe Yehova nomwanalhusayaho esyongyike esyo, Farao mwabya iniakinakalirye omuthima.

Yehova mwabwira Musa athi: ‘Sumba ebyalha byawu erilholyabyo elhubulha.’ Neryo-neryo, ekyanya mukyabya mwa mwirima munene kutsibu. Ahabw’ebiro bisathu, Abanya Misiri isibangalhangira ekyosi-kyosi. Abaisraeli basa bababya bawithe ekyakakalha eyo babya bikere.

Farao mwabwira Musa athi: ‘Iwe n’abandu benyu mughende. Ebisoro byenyu bya musighe.’ Musa mwabugha athi: ‘Thutholere ithwathwalha ebisoro byethu nuku thwangayabihongera Nyamuhanga wethu.’ Farao mwahithana kutsibu. Mwapura athi: ‘Mulhue hano! Namathasyabalhangira, iningendi bitha.’

“Mwasombolha n’eriminyerera omo kathi-kathi k’abathunganene n’ababi, n’omo kathi-kathi k’oyukakolera Nyamuhanga n’oyuthemukolera.”​—Malaki 3:18