Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Amasomo Agho Wang’igha Okwa by’Omwa Biblia

 ERISOMO 19

Ebihunzo Bisathu eby’Erimbere

Ebihunzo Bisathu eby’Erimbere

Abaisraeli mubakakwa erikolha kutsibu ng’abakobe. Yehova mwathuma Musa na Haruni ibanahekire omwatsi ono: ‘Wuleke abandu baghe baghende nuku banga yanyiramya omo mbwarara.’ Omwa miyiheko Farao mwasubirya athi: ‘Sinangowa ebya Yehova akabugha, kandi sinendi lighira Abaisraeli erighenda.’ Neryo Farao mwabakaka erithasyongera erikolha kutsibu. Yehova mwaghesya Farao y’erisomo. Wunasi nga mwakikolha athi? Mwakolya okwa Banya Misiri kw’Ebihunzo Ikumi. Yehova mwabwira Musa athi: ‘Farao abirighana erinyowa. Omwa ngyakya, akendi syabya okwa Lhusi Nili. Wasyaghenda eyali n’erimubwira wuthi kundi syathalighira abandu baghe erighenda, amaghetse wosi aw’omwa Nili akendibya musasi.’ Musa mwowa neryo amaghenda eyiri Farao. Farao mwalhangira Haruni akaswirya Olhusi Nili omo mutso wiwe, neryo olhusi mulhwahinduka musasi. Olhusi mulhwatsuka eribeha, esiswe syamaholha, hamabya isihali n’amaghetse awuwene aw’erinywa okwa lhusi Nili. Nomwabine bithya, Farao mwaghana erilighira Abaisraeli athi baghende.

 Habere hahwa biro musanju, Yehova mwathasyathuma Musa oku Farao n’omwatsi ono: ‘Wamathendi leka abandu baghe bakaghenda, e Misiri iyikendyusulha mw’ebikere.’ Farao kandi mwathaligha, neryo Haruni mwasumba omutso wiwe, neryo ebikere byamatsuka eriswika ekihugho kyosi ekye Misiri. Ebikere mubyingira omwa manyumba w’abandu, omwa syongyingo syabu, n’omwa syobbakuli syabu. Ebikere mubyabya ehosi! Farao mwabwira Musa athi alembe-lembe Yehova athi imanaye ekihunzo ekyo. Farao mwayilhagha athi akendi leka Abaisraeli baghende. Neryo Yehova mwimania ekihunzo ekyo, n’Abanya Misiri mubaghenda bakarunda ebikere ebiholire mwa birundo-birundo. Ekihugho mukyatsuka eribeha. Aliwe, kandi, Farao mwaghanira Abaisraeli erighenda.

Neryo Yehova mwabwira Musa athi: ‘Haruni aswiraye ekithaka ky’omwa mutso wiwe, neryo olhuthuthu lhukendi hinduka mw’ehihuka ehikalhuma.’ Haruni abere abirikolha ekyo, ehihuka ehyo muhyabya ehosi-hosi. Abaghuma b’okwa bandu ba Farao mubamubwira bathi: ‘Ekihunzo eki kikalhua oku Nyamuhanga.’ Nomwabine, Farao mwaghanira Abaisraeli.

‘Nasyaminyisyabo obuthoki bwaghe n’amaaka waghe. Basyaminya erina lyaghe ko liri Yehova.’​—Yeremia 16:21