Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Amasomo Agho Wang’igha Okwa by’Omwa Biblia

 ERISOMO 15

Yehova Mwath’ibirirwa Yozefu

Yehova Mwath’ibirirwa Yozefu

Yozefu abere ane omwa ngomo, Farao, omwami we Misiri, mwalhotha ebilhotho indi hamabya isihali oyuwanga bisoborera. Omughuma w’okwa baghombe biwe mwabwira Farao athi Yozefu anganathoka erimusoborera nga bikamanyisayaki. Aho n’aho Farao mwathumira oku Yozefu.

Farao mwabulya athi: ‘Wangana soborera ebilhotho byaghe?’ Yozefu mwabwira Farao athi: ‘E Misiri yikendibya ebyalya binene ahabw’emyaka musanju, ikwakwama eyindi myaka musanju ey’enzalha nene. Wusondaye omundu w’amenge oyukendi bika ebyalya nuku abandu bawu baleke erisyakwa enzalha.’ Farao mwasubirya athi: ‘Namakusombolha! Wukendibya mulhume wakabiri ow’obuthoki omwa Misiri!’ Yozefu mwaminya athi erikumbulha ebilhotho bya Farao? Yehova mwawathikya Yozefu.

Omo myaka musanju eyo, Yozefu mwabika ebyalya binene by’omwa bighona. Enyuma waho enzalha muyahika omwa kihugho kyosi, ngoku Yozefu anabugha. Abandu mubalhua omwa bitsweka ebyosi erisyaghulha ebyalya oku Yozefu. Thatha wiwe, Yakobo, mwowa ngoku e Misiri yiri ebyalya, neryo mwathuma baghalha biwe ikumi eriyabaghulira kubyo.

Baghalha ba Yakobo mubaghenda eyiri Yozefu, kandi mwalhua iniabaminyerera. Aliwe baghalha babu mubathaminya ngoku ni Yozefu. Mubamunamira, ngoku analhotha iniakine mulere. Yozefu mwanza eriminya baghalha babu nga bakine bandu abakapona abandi. Neryo mwababwira athi: ‘Inywe muli balingyi. Mukanza eriminya aho ekihugho kyethu kiremirwe.’ Mubabugha bathi: ‘Eyihi! Thuli baana 12 erilhua e Kanana.  Owundi mughalha wethu abirikwa, n’omulere ane na thatha wethu.’ Neryo Yozefu mwabugha athi: ‘Munyirethere omulere wenyu, mungendi ligha ebya mukabugha.’ Neryo mubasuba eyiri thatha wabu.

Ebyalya ebya bathwalha byabere bikahwa, Yakobo mwathuma baghalha biwe be Misiri kandi. Lero lino mubaghenda na Benyamini, omulere wabu. Erilenga okwa baghalha babu, Yozefu mwabisa ekikopo kiwe ky’efeza omwa ngunza ya Benyamini ey’ebyalya neryo amabugha athi bal’ibakyo. Abaghombe ba Yozefu babere babana ekikopo ekyo ky’omwa ngunza ya Benyamini, baghalha babu mubasweka. Mubalemba-lemba Yozefu bathi abasuyire omwakanya k’erisuyira Benyamini.

Aho Yozefu mwaminya ngoku baghalha babu babirihinduka. Yozefu mwabya isyanga thasyakakirya eriyowa liwe. Mwakwama kya hutana n’ekiriro n’eribugha athi: ‘Indi mughalha wenyu, ya Yozefu. Thatha waghe akineho?’ Baghalha babu abo mubasweka. Mwababwira athi: ‘Simuyowe nabi busana n’ekya mwanyikolera. Nyamuhanga anyithuma eno erilhamya esyongebe syenyu. Neryo kwa munanguhe muthya, mulethe thatha waghe.’

Mubasuba ewabu eriyabwira thatha wabu y’omwatsi mubuyanga oyu n’erimuletha e Misiri. Erighunzerera, Yozefu mwathasyabya n’ab’eka yabu ihamabirilhaba myaka mingyi.

“Mwamathendi buyira abandi b’amalholho bakabakolera, Thatha wenyu siendi syababuyira amalholha agho mwabirikolha.”​—Matayo 6:15