Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Amasomo Agho Wang’igha Okwa by’Omwa Biblia

 ERISOMO 21

Ekihunzo ky’Erikumi

Ekihunzo ky’Erikumi

Musa mwalhaghanisya Farao athi syendi syasamulholhako. Aliwe abere athalyaghenda, mwabwira Farao ya bino: ‘Omo kathi-kanene k’ekiro, ehimbere ehyosi hye Misiri, eritsuka okwa kambere ka Farao erihika okwa kambere k’abakobe, hyasyaholha.’

Yehova mwabwira Abaisraeli athi bathegheke ekihulho ky’embaghane. Mwabugha athi: ‘Mwithe embangali y’omwaka mughuma kutse embene, mwan’imya okwa musasi wayu erihiragho okwa syonyukyo syenyu. Mwokaye esyonyama, n’erisirira okwa muggati owathe mwa kihamya. Mubye imunambere, n’eriambalha ebiryathu, imunayitheghekire erighenda. Munabwire mukendibya bwiranda.’ Wukalengekanaya Abaisraeli mubatsema bungahi?

Omo kathi k’ekiro, omumalaika wa Yehova mwahika okwa buli nyumba omwa Misiri. Esyonyumba esithabya kw’omusasi okwa syonyukyo, ehimbere hyomo muhyakwa. Aliwe malaika iniakakyuruka esyonyumba esiri kw’omusasi. Obuli Munya Misiri, omugaga kutse omunakwa, mwaholerwa omwana. Aliwe omwa Baisraeli omwana na mughuma mwathakwa.

Na mughalha wa Farao nayu mwaholha. Farao mwabya isyanga thasyaghumira eki. Aho n’aho mwabwira Musa na Haruni  athi: ‘Muhangane. Mulhue omwa bandu baghe. Mughende muramaye Nyamuhanga wenyu. Muthwale ebisoro byenyu, mughende!’

Omwa kibamba-ngoma ky’okwezi, Abaisraeli mubahongoka erilhua e Misiri, ibanayithondekenia mwa mahiika n’ebihanda. Babya balhume na bakali n’abaana 600,000. Kandi n’abandi bandu bangyi mubabakwama nuku nabu bayaramaye Yehova. Lero lino Abaisraeli babya ibamabya bwiranda!

Eryibuka ngoku Yehova abalhamaya, babya ibakendi syabya bakakolha omukonga oyo obuli mwaka. Akahulhawamu Ekiro Kikulhu eky’Erikyuruka.

“Nabirikuhira oko ngoma busana n’omwatsi oyu, inathoka erikangya obuthoki bwaghe ewawu, kandi erina lyaghe lithulhughanibawe omo kihugho kyosi.”​—Abanya Roma 9:17