Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Amasomo Agho Wang’igha Okwa by’Omwa Biblia

 ERISOMO 12

Yakobo Mwahebwa Omwandu

Yakobo Mwahebwa Omwandu

Isaka abya w’emyaka 40 omughulhu aherukaya Rebeka. Aby’anzire Rebeka ya kutsibu. Endambi muyahika bamabutha baana babiri b’obulhume ababya bahasa.

Omukulhu in’iyo Esau, n’omulere in’iyo Yakobo. Esau inianzire erisiba omoli, kandi iniasi erihigha ebisoro. Aliwe Yakobo inianzire erisiba eka.

Omwa biro ebyo, omwana omukulhu iyukahebawa erithaka linene n’ebindu, thatha wiwe akaholha. Ibakahulha ekyo mw’omwandu. Omw’eka yabu Isaka, omwandu oyo mwabya imwamuli n’erisyabya omwa bakendi syaberererya emilhaghe eya Yehova alhagha Abrahamu. Esau mwathatsomana emilhaghe eyo, aliwe Yakobo iyo aby’asi ngoku ni y’omughaso munene.

Kiro kighuma Esau mwasa eka iniabirilhuha akalhua omwa buhighi. Mwowa ebyalya ebyuwene ebya Yakobo aby’akatsumba bikabeha n’eribugha athi: ‘Ngakwa n’enzalha! Umba okwa mukubi owahenirye oyo.’ Esau athi: ‘Ingye singatsomene omwandu waghe! Wimayegho. Ingye nganza erirya.’ Wukalengekanaya ekya Esau akolha ekyo kyanabya ky’amenge? Eyihi nahake. Esau mwabya iniamahayo ekindu ky’obughuli bunene, habw’omukubi buyira.

 Isaka abere abiribya musyakulhu, obuthuku bwabya ibwamahika obw’eritsumulha omwana omukulhu. Aliwe Rebeka mwawathikya Yakobo, omwana mulere, eribana omughisa. Esau abere aminya, mwahithana kutsibu kandi mwathegheka er’itha mughalha wabu. Isaka na Rebeka mubanza eritheya Yakobo, neryo mubamubwira bathi: ‘Wughende, wikale na mughalha wobu mama wawu, ya Labani, erihika aho Esau asyahumulikanira.’ Yakobo mwahulikirira ababuthi biwe neryo mwaghenda busana n’eribalya engebe yiwe.

“Ko omundu akabana ndundi yahi amathunda ekihugho kyosi, nikwa akathalya engebe yiwe kwehi?”​—Mariko 8:36, 37