Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Amasomo Agho Wang’igha Okwa by’Omwa Biblia

 ERISOMO 5

Obwathu bwa Noa

Obwathu bwa Noa

Endambi muyahika abandu bamabya banene okwa kihugho. Abanene babya babi. Nibya n’abandi bamalaika omwa lhubulha mubabya babi. Mubasighania obwikalho bwabu bw’elhubulha bamasa okwa kihugho. Wunasi ekyaleka ibakolha ekyo? Bakolha ekyo nuku bambale emibiri y’abandu banathahya abakali.

Abamalaika na bakali abo mubabutha abaana. Abaana abo mubakulha bamabya n’amani manene kutsibu kandi ini b’omwagha. Mubahuthangalya abandu. Yehova abya isyangalighira ebindu ng’ebyo erilholha embere. Neryo mwathwamu erithoghothya abandu babi omw’ighunga ly’amaghetse.

Aliwe habya ihane omulhume oyuli mbaghane. Aby’anzire Yehova. Erina liwe iya Noa. Aby’awithe omukali n’abaghalha basathu, ya Semu, Hamu, na Yafeti, kandi obuli mughalha wiwe abya inianawithe omukali. Yehova mwabwira Noa athi akole obwathu bunene kutsibu nuku iyo n’eka yiwe banga syalhama okw’Ighunga ly’Amaghetse. Obwathu obu bwabya ng’esanduko nene kutsibu eyanga leretha okwa maghetse. Kandi Yehova mwabwira Noa athi ingiraye ebisoro bingyi by’omwa bwathu nuku nabyo bilhame.

Neryo Noa mwatsukiraho erikolha obwathu. Noa n’eka yiwe mubaghunza hakuhi myaka 50 ibanemukolha obwathu obo. Mubakolha obwathu obo ngoku Yehova anababwira. Okwa buthuku obo, Noa iniakabya inianemubwira abandu ngoku hakendibya erighunga ly’amaghetse. Aliwe mubathahulikirira.

Erighunzerera, endambi y’eringira omo bwathu muyahika. Thulebaye ekya kwamako.

“Erihika ly’Omughalha w’Omundu lyasyabya ng’omwatsi w’ebiro bya Noa.”​—Matayo 24:37