Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Amasomo Agho Wang’igha Okwa by’Omwa Biblia

 ERISOMO 3

Adamu na Eva Mubathowa Nyamuhanga

Adamu na Eva Mubathowa Nyamuhanga

Kiro kighuma Eva iniane iyuwene, enzoka muyakania nayu. Muyabugha yithi: ‘Nina kwenene indi Nyamuhanga abirikuthanga erirya okwa bighuma by’emithi yosi?’ Eva mwabugha athi: ‘Thwanganalya okwa bighuma by’emithi yosi kwihaho omughuma musa. Thwamalya okwa muthi oyo, ithukendi holha.’ Enzoka muyabugha yithi: ‘Simwendi syaholha. Kandi nibya, mwamalya kugho, imukendibya nga Nyamuhanga.’ Eyo yanabya kwenene? Eyihi, abya mabehi. Aliwe Eva mwalighagho. Eva abere asamalira ekighuma kya kutsibu, mwanzakyo. Mwalya okwa kighuma amaha na Adamu. Adamu abya inianasi ngoku ibakendi holha bamathendiowa Nyamuhanga. Aliwe Adamu mwakwama kya kirya.

Omw’igholho ly’ekiro ekyo, Yehova mwakania na Adamu na Eva. Mwababulya ekilekire ibabya bathowa nga niki. Eva mwatsweba enzoka, na Adamu mwatsweba Eva. Kundi Adamu na Eva mubathamwowa, Yehova mwabalhusya omw’irima lye Edeni. Yehova mwahira oko bwingiriro bw’eririma eryo kwa bamalaika n’omuyali w’omuliro nuku Adamu na Eva baleke erisyasuba mulyo.

Yehova mwabugha athi n’oyuwatheba Eva nayu akendi suyirwa. Si bugha indi enzoka y’eyakanaya na Eva. Yehova mwathahangika esyonzoka esikabugha. Omumalaika mubi yuwabughira omwa nzoka. Akolha eki erithebya Eva. Malaika oyo akahulhawamu Sitani Diabolo. Obuthuku obukasa, Yehova akendi syathoghothya Sitani nuku syalhole embere erithebya abandu erikolha ebindu bibi.

“Sitani . . . iyo ni mwithi. Siali mw’omwatsi w’ekwenene, kusangwa sihali mwatsi w’ekwenene omo muthima wiwe.”​—Yoane 8:44