Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Amasomo Agho Wang’igha Okwa by’Omwa Biblia

 ERISOMO 100

Paulo na Timoteo

Paulo na Timoteo

Timoteo abya mughalha wethu mulere omwa kithunga kye Listra. Thatha wiwe abya Mugiriki, na mama wiwe abya Muyuda. Mama wiwe iya Euniki, na mukaka wiwe Loisi mubakangirirya Timoteo oku Yehova eritsuka omwa bulere bwiwe.

Paulo abere akahika e Listra omwa lhughendo lhwiwe olhwakabiri olhw’eriyathulira, mwalhangira Timoteo kwenene inianzire balikyethu kandi inianzire kutsibu eribawathikya. Paulo mwakokya Timoteo erighenda haghuma nayu. Ahabw’obuthuku, Paulo mwa thendeka Timoteo eribya muthuliri kandi mukangirirya mubuya w’engulhu yuwene.

Omulimu abuyirire mwasondolha Paulo na Timoteo ehosi baya. Kiro kighuma, omwa kiro, omwa syonzoli omulhume mwabwira Paulo athi aye e Makedonia eriyabawathikya. Neryo Paulo, Timoteo, Sila, na Luka mubayayo eriyathulira n’eritsukisya ebithunga.

Omwa muyi we Makedonia e Tesalonika, abalhume n’abakali bangyi mubabya Bakristayo. Aliwe abandi Bayuda mubahithana oku Paulo n’ababya nabo. Mubahamba balikyethu aba n’eribathwalha eyiri abathabali b’omuyi ibane mubugha bathi: ‘Abalhume aba ni syonzighu sy’obuthabali bwe Roma!’ Engebe ya Paulo na Timoteo yabya omwa kabi, neryo omwa kiro mubathibitha e Beroya.

Abandu be Beroya babya banzire kutsibu eriminya engulhu yuwene, kandi Abagiriki n’Abayuda eyo mubikirirya. Aliwe omughulhu abandi Bayuda balhua e Tesalonika, n’eribendererya, Paulo mwalhuayo mwaghenda e Atene. Timoteo na Sila mubasighalha e Beroya erighumya balikyethu. Obuthuku mubwahika Paulo amathasyathuma Timoteo ye Tesalonika eriwathikya balikyethu erighumira  eriendereribwa erikalire eryabyayo. N’enyuma waho, Paulo mwathuma Timoteo eribungira ebithunga bingyi n’eribaghumya.

Paulo mwabwira Timoteo athi: ‘Abanzire erikolera Yehova basyendereribwa.’ Timoteo mwendereribwa n’erihirwa omwa ngomo busana n’erikirirya liwe. Mwatsema busana n’akaghisa ako ak’erikangania obuthaleghulha bwiwe oku Yehova.

Paulo mwabwira Abanya Filipi athi: ‘Ngabathumira Timoteo. Akendi bakangirirya ekya kikamanyisaya erilendera omwa kwenene, n’eribathendeka erithulira.’ Paulo mwaminya ngoku angana yikethera Timoteo. Ahabw’emyaka mingyi, mubakolha haghuma ng’abanywani kandi ng’abaghombe ba Nyamuhanga.

“Singwithe owundi oyuwithe omuthima ng’owaghe kutse oyubahirire kw’omuthima. Kusangwa abosi bakakwama emyatsi yabu, butsira emyatsi ya Yesu Kristo.”​—Abanya Filipi 2:20, 21

Thasyaminya Bingyi

Mukangiriraye Abaana Benyu

Timoteo Aby’Anzire Eriwathikya Abandu

Wanga thunga wuthi etseme omwa ngebe, nga Timoteo?