Ghenda ahali omwatsi

Ghenda ahali ebirimo

 ERISOMO 101

Paulo Akathumawa e Roma

Paulo Akathumawa e Roma

Olhughendo lhwa kasathu lhwa Paulo olhw’eriyathulira mulhwahindira e Yerusalemu. Eyo mwahambwa n’erihirwa omwa ngomo. Omwa kilhotho, omwa kiro, Yesu mwamubwira athi: ‘Wukendi ghenda e Roma eriyathulirayo.’ Paulo mwalhusibwa e Yerusalemu n’erithwalhwa e Kaisaria, eyo aghunza myaka ibiri iniane omwa ngomo. Omughulhu Omuthabali Festo athondesaya Paulo, Paulo mwabugha athi: ‘Muleke Kaisari owe Roma yunyitswere.’ Festo mwabugha athi: ‘Wukasaba eriya embere sya Kaisari, ewa Kaisari yo wune mwendiya.’ Mubahira Paulo y’omo bwathu obukaya e Roma, kandi balikyethu Abakrisitayo babiri iya Luka na Aristariko mubaghenda nayu.

Okwa ngetse, ekiyagha kinene mukyahitha, kandi mukyaghunza biro binene. Obuli mundu mwalengekania athi lero bakayaholha. Aliwe Paulo mwabugha athi: ‘Balhume, omumalaika mwakambwira omwa kilhotho athi, Paulo, siwubahe. Wukendi hika e Roma, n’abosi abawuli nabu omo bwathu bakendi hika buholho. Muhande emithima! Sithwendi holha.’

Ekiyagha eki mukyaghunza ebiro 14. Erighunzerera, omusike mwalhangirwa. Kyabya iky’ekizinga kye Melita. Obwathu mubwayikura ahisi neryo mubwathulika mwa bihandi-bihandi, aliwe abandu abosi nga 276 mubalhuamu ndeke. Abandi mubaziha n’abandi bamamakirira ebihandi-bihandi ebyo eribaletha okwa musike. Abandu be Melita mubabatsomana n’eribakirya omuliro w’eryotha.

Enyuma w’amyezi isathu, abasirikali mubakolesya obundi bwathu erithwalha Paulo ye Roma. Abere ahikayo, balikyethu mubasyamulebya. Paulo abere akabalhangira, mwaha Yehova y’ewasingya neryo mwaghuma. Nomwakine indi Paulo abya munyangomo, mwalighirwa eribya omwa nyumba y’eripangisya aliwe omusirikali inianamutheghirye. Mw’ikalhamo ahabw’emyaka ibiri. Abandu ibakasyamulebaya, neryo iniakabathulira oko Bwami bwa Nyamuhanga n’eribakangirirya oku Yesu. Kandi Paulo mwahandikira ebithunga by’esyobaruha omwa Asia Enyike ne Yudea. Omo kwenene, Yehova mwakolesya Paulo erithulha engulhu yuwene okwa bihanda.

“Omo myatsi yosi thukayikanganaya ng’abaghombe ba Nyamuhanga, ithukayiyinaya kutsibu, ithukalholha okwa malighe, n’eribulha ebitholere, ithukaghalhawa.”​—2 Abanya Korinto 6:4