Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Amasomo Agho Wang’igha Okwa by’Omwa Biblia

 ERISOMO 97

Kornelio Akathunga Omulimu Abuyirire

Kornelio Akathunga Omulimu Abuyirire

E Kaisaria, yabya omukulhu w’amahe Omunya Roma oyukahulhawa mwa Kornelio. Nomwakine indi syabya Muyuda, Abayuda babya bamusikirye. Abya akawathikya abera. Kornelio mwikirirya Yehova kandi iniakamusaba buli kiro. Kiro kighuma, omumalaika mwahika oku Kornelio n’erimubwira athi: ‘Nyamuhanga abiriowa erisaba lyawu. Na lino wuthume abalhume omwa muyi we Yopa, eyo Petero ikere, n’eribugha wuthi ase ewawu.’ Aho n’aho, Kornelio mwathuma abalhume basathu eryandaghalira e Yopa, esyokilomita nga 50.

Petero abere iniane e Yopa mwathunga ekilhotho. Mwalhangira ebisoro ebyo Abayuda babya isibatholere erirya, neryo mwowa omulenge akamubwira athi wulye. Petero mwaghana, mwabugha athi: ‘Omwa ngebe yaghe sindi nathalya ekisoro ekithunda-thundire.’ Neryo omulenge mwamubwira athi: ‘Isiwabugha wuthi ebisoro ebi bithunda-thundire. Nyamuhanga abiribyerya.’ Kandi Petero mwabwirwa indi: ‘Abalhume basathu bane okwa lhukyo lhwawu. Wughende nabu.’ Petero mwaghenda okwa lhukyo n’eribulya abalhume athi nga bakasyendaki. Mubamusubirya bathi: ‘Kornelio omukulhu w’amahe Omuroma yulyathuthuma. Athi wughende ewiwe e Kaisaria.’ Petero mwabakokya omwiwe n’eribaha  ah’erighotsera. Engyakya, mwaghenda nabu e Kaisaria, haghuma n’abandi balikyethu abe Yopa.

Omughulhu Kornelio alhangira Petero mwakukama ahisi. Aliwe Petero mwabugha athi: ‘Hangana! Naghe ngali mundu ng’iwe. Nyamuhanga mwambwire athi ngase omwa nyumba yawu, nomwakine indi Abayuda sibaliya omwa manyumba w’Abanya Bihanda. Neryo mbwire ekiryaleka iwanyithumirako.’

Kornelio mwabwira Petero athi: ‘Hamathalhaba biro bbini, ngabya ingane musaba Nyamuhanga, omumalaika mwambwire athi ngakuthumireko. Kisi thukangiriraye ebinywe bya Yehova.’ Petero mwabugha athi: ‘Nabiriminya ngoku Nyamuhanga syawithe kasolholho. Akaligha obuli mundu oyukanza erimuramya.’ Petero mwabakangirirya emyatsi mingyi oku Yesu. Neryo omulimu abuyirire mwahika oku Kornelio n’abosi ababya nayu, kandi abosi mubabatizibwa.

“Nikwa omwa buli kihanda omundu oyukubaha Nyamuhanga, n’erikolha ebithunganene akalighawa nayu.”​—Emibiri 10:35