Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Amasomo Agho Wang’igha Okwa by’Omwa Biblia

 ERISOMO 94

Abigha Bakathunga Omulimu Abuyirire

Abigha Bakathunga Omulimu Abuyirire

Habere habirilhaba biro ikumi Yesu ali ghendire elhubulha, abigha biwe mubathunga omulimu abuyirire. Yabya Pentekote 33 E.K., kandi abandu babya ibabirilhua omwa bitsweka bingyi eryasa e Yerusalemu okwa mukonga oyo. Abigha ba Yesu nga 120 babya ibabirihindana haghuma omwa kyumba ky’endatha. Neryo, muhabya ekindu ekikaswekaya. Ekindu ekiri ng’ekirimi ky’omuliro mukyabya okwa muthwe w’obuli mwigha, kandi abosi mubatsuka erikania omwa mibughe muthina-muthina. Omulenge munene owali ng’ekihunga kinene musulha omwa nyumba.

Abagheni ababya ibabiryasa e Yerusalemu mubowa omulenge neryo mubasa bakathibitha omwa nyumba erilebya ekyamabya. Mubasweka bakowa abigha bakakania emibughe eyi. Mubabugha bathi: ‘Aliwe abandu aba ka ni Banya Galilaya. Bamathoka bathi erikania omwa mibughe yethu?’

Neryo Petero n’abandi bakwenda mubimana embere sy’abandu. Petero mwakanirya bandu ngoku Yesu ithawa kandi ngoku Yehova mwamulhubukya okwa baholi. Petero mwabugha athi: ‘Lino Yesu ane  elhubulha okwa lhuhandi lhw’amali lhwa Nyamuhanga, kandi abirithuma omulimu abuyirire owa lhaghanisibawa. Kya kyamaleka imwalhangira n’eriowa ebithiko-thiko ebi.’

Ebinywe bya Petero mubyahamba okwa bandu kwa kutsibu neryo mubabugha bathi: “Thuyire thuthi kwehi?” Petero mwabwirabo athi: ‘Mubindule emithima yenyu muleke ebibi, kandi obuli mundu abatizibawe omwa lina lya Yesu. Kandi mwasyabana olhusunzo lhw’omulimu abuyirire.’ Okwa kiro ekyo, abandu nga 3,000 mubabatizibwa. Erilhwiririra n’aho, abigha mubatsuka eryongera kutsibu omwa Yerusalemu. Busana n’obuwathikya bw’omulimu abuyirire, abakwenda mubatsukisya ebithunga bingyi nuku banga kangirirya abigha ebyosi ebya Yesu abahana.

“Wamakangya omwa buno ko Yesu ni Mukama, kandi wamikirirya omwa muthima wawu ko Nyamuhanga amulhubukaya okwa baholi, wasyalhamibwa.”​—Abanya Roma 10:9