Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Amasomo Agho Wang’igha Okwa by’Omwa Biblia

 ERISOMO 90

Yesu Akaholera e Gologota

Yesu Akaholera e Gologota

Omuhereri mukulhu mwathwalha Yesu omwa kikali ky’omuthabali Pilato. Mwababulya athi: ‘Omulhume oyu mukamuhandikirira busana naki?’ Mubabugha bathi: ‘Akayahulha mo mwami!’ Pilato mwabulya Yesu athi: “Wuli Mwami w’Abayuda?” Yesu mwasubirya athi: “Obwami bwaghe si bw’ekihugho kino.”

Neryo Pilato mwathuma Yesu y’ewa Herode, omuthabali we Galilaya, erilebya ng’anemwendi mubana kw’omwatsi wosi-wosi. Herode mwathamubana kw’omwatsi wosi-wosi, neryo mwathasya musubya eyiri Pilato. Neryo Pilato mwabwira abandu athi: ‘Ingye na Herode sithwathabana oko mundu oyu kw’omusangu wosi-wosi. Ngendi muboholha.’ Abandu mubabirikira n’omulenge munene bathi: ‘Omundu oyo akwe! Omundu oyo akwe!’ Abasirikali mubaswirya Yesu y’omwa mikoba, bamamuthwira kw’amathande, n’erimuswirya. Mubamwambalya embitha y’amahwa okwa muthwe n’erimusekererya bathi: ‘Wabukire, Omwami w’Abayuda.’ Kandi Pilato mwabwira abandu athi: ‘Omulhume oyu singathamubana kwa kibi kyosi-kyosi.’ Aliwe mubalhaka bathi: ‘Ahanikawe!’ Neryo Pilato mwabalhwikirayo bamwithe.

Mubathwalha Yesu ye Gologota, mubamukongomerera okwa muthi neryo bamatsimbagho. Yesu mwasaba athi: ‘Thatha, wughanyirebo kusangwa sibasi ekya bakakolha.’ Abandu mubasekererya Yesu bathi: ‘Wamabya iwuli Mughalha wa Nyamuhanga, thayikimya okwa muthi oyo! Yilhamaye.’

Omughuma w’okwa bakolha-nabi ababya bahanikire hakuhi na Yesu mwabugha athi: “Wunyibuke wukingira omo Bwami bwawu.” Yesu mwamulhaghanisya athi: ‘Wukendi syabya naghe omwa Paradiso.’ Omw’ithungyi, muhabya omwirimya ahabw’esyosaha isathu. Abandi bigha mub’imana hakuhi n’omuthi owa Yesu aby’ahanikireko, imwamuli Maria, mama wa Yesu. Yesu mwabwira Yoane athi atheghaye Maria nga mama wiwe-wiwe.

Erighunzerera, Yesu mwabugha athi: “Byamahwa!” Munamya omuthwe wiwe neryo amaholha. Okwa ndambi eyo, muhalhaba omusiki munene kutsibu. Omwa hekalu, olhukimba olhughumire olhwabya  ahakathi-kathi k’Ahabuyirire n’Ahabuyirire Kutsibu mulhwasathika mwa bihandi bibiri. Omukulhu w’abasirikali mwabugha athi: ‘Oyu kwenene alhue Mughalha wa Nyamuhanga.’

“N’iyo oyuli ‘egha’ busana n’erilhagha lyosi lya Nyamuhanga.” ​—2 Abanya Korinto 1:20