Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Amasomo Agho Wang’igha Okwa by’Omwa Biblia

 ERISOMO 93

Yesu Akasuba Elhubulha

Yesu Akasuba Elhubulha

Yesu mwasanga-sangana n’abigha biwe e Galilaya. Mwabaha ekihano kikulhu athi: ‘Mughende muyire abigha okwa bihanda byosi. Mukangirirayebo ebyosi ebyo nabiribakangirirya, kandi mubatizayebo.’ Neryo mwalhaghanisya athi: ‘Mwibuke, ngendi syabya ingane haghuma nenyu mughulhu wosi.’

Omwa biro 40 ebya Yesu aghunza alilhubukire, mwabuthukira okwa bigha biwe bangyi e Galilaya ne Yerusalemu. Mwabakangirirya amasomo w’omughaso kandi mwakolha ebithiko-thiko bingyi. Neryo mwahindana n’abakwenda biwe omurundi w’erighunzerera okwa Kithwe ky’Emizeituni. Yesu mwabugha athi: ‘Simulhue e Yerusalemu. Mubye imunalindire ekya Thatha alhagha.’

Abakwenda biwe mubathayitheghererya eky’amanyisaya. Mubamubulya bathi: ‘Wukayabya Mwami we Israeli lino?’ Yesu mwabugha athi: ‘Obuthuku bwa Yehova erinyiyira mo Mwami sibuli bwahika. Omwa buthuku buthe bwahali mukendi bana obuthoki erilhua okwa mulimu abuyirire, kandi mukendibya bema baghe. Mughende muyathulire e Yerusalemu, e Yudea, e Samaria, n’okwa nduli-nduli sy’ekihugho.’

Neryo Yesu mwasumbwa omo kyanya n’ebithu mubyamubulirania. Abigha biwe mubasighalha ibanasamalire omo kyanya, aliwe abya iniaghendire.

Abigha mubalhua okwa Kithwe ky’Emizeituni bamaghenda e Yerusalemu. Ibakahindana n’erisaba haghuma mughulhu wosi omwa kyumba ky’endatha. Babya ibanalindirire Yesu erithasyabaha obundi busondoli.

“Kandi engulhu yuwene y’Obwami eyi yasyatsuka erithulhughanibwa omwa kihugho kyosi busana n’eriminyisya ebihanda byosi, neryo enduli yasyahika.”​—Matayo 24:14