Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Amasomo Agho Wang’igha Okwa by’Omwa Biblia

 ERISOMO 87

Ekihulho kya Yesu eky’Erighunzerera

Ekihulho kya Yesu eky’Erighunzerera

Obuli mwaka Abayuda ibak’ibuka Ekiro Kikulhu ky’Erikyuruka biro 14 okwezi kwe Nisani. Eki kyabya kikabibukya ngoku Yehova abalhusaya omwa bukobe bwe Misiri n’eribaletha omwa Kihugho Ekyalhaghanisibawa. Omo mwaka wa 33 E.K., Yesu n’abakwenda biwe mub’ibuka Ekiro Kikulhu ky’Erikyuruka omwa kisenge ky’endatha e Yerusalemu. Babere baghunza erirya, Yesu mwabugha athi: ‘Omughuma w’okw’inywe akendi nyighoberya.’ Abakwenda mubasweka, neryo mubabulya Yesu bathi: ‘Nindi?’ Yesu mwabugha athi: ‘Yo mulhume oyo ngend’iha omuggati oyu.’ Neryo mwaha Yuda Iskariota y’omuggati. Aho n’aho, Yuda mwahangana amahulhuka.

Neryo Yesu mwasaba, amatsutsanga omuggati n’erihagho abandi bakwenda. Mwabugha athi: ‘Mulye omuggati oyu. Akimanira omubiri waghe, owa ngendihayo busana nenyu.’ Neryo kandi mwasaba busana ne vini n’erihayo abakwenda biwe. Mwabugha athi: ‘Munywe evini eyi. Yikimanira omusasi waghe, owa ngendihayo nuku ebibi byanga ghanyirwa. Ngabalhaghanisaya nyithi mukendi syabya bami haghuma naghe elhubulha. Mubye mukakolha eki obuli mwaka erinyibuka.’ Abakwamire Yesu bakahindana haghuma omw’igholho eri obuli mwaka. Erihindana eryo likahulhawa mwa Ekihulho ky’Omukama eky’Erigholho.

 Babere baghunza erirya, abakwenda mubakuba obuhaka omukulhu nga nindi. Aliwe Yesu mwababwira athi: ‘Omukulhu omw’inywe y’oyukayithwalha mwa mulere, oyutheyilhangira mwa mukulhu okwa bandi.

‘Muli banywani baghe. Ngababwira ebyosi ebyo Thatha waghe anzire ingababwira. Ngakisiya ingaghenda eyiri Thatha waghe elhubulha. Ngendi basigha, n’abandu bakendi syaminya ngoku muli bigha baghe busana n’olhwanzo olhwa muwithirene. Mwanzane ngoku naghe ngabiribanza.’

Erighunzerera, Yesu mwasaba, eribwira Yehova athi atheghaye abigha biwe bosi. Mwasaba Yehova eribawathikya erikolera haghuma omwa buholho. Mwasaba athi erina lya Yehova libye libuyirire. Neryo Yesu n’abakwenda biwe mubimbira Yehova neryo bamahulhukira eyihya. Endambi ya Yesu erihambwa yabya iyikayahika.

“Ekihyo kike, simubahe kusangwa kikatsemesaya Thatha wenyu yo ndeke eribaha Obwami.”​—Luka 12:32