Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Amasomo Agho Wang’igha Okwa by’Omwa Biblia

 ERISOMO 84

Yesu Akathandayira Okwa Maghetse

Yesu Akathandayira Okwa Maghetse

Yesu mwathalhamya abalhwere n’erilhubukya abaholi lisa aliwe kandi mwabya n’obuthoki okwa muyagha n’embulha. Yesu abere abiriyasabira okwa kithwe, mwasamalira eyikwa okwa Ngetse ye Galilaya amalhangira ekihunga kinene. Abakwenda biwe babya ibane omo bwathu, ibane mulengaho erighendya obwathu omwa kihunga. Yesu mwandaghalha amathandayira okwa maghetse erilholha eyiri obwathu bwabu. Abakwenda babere bakalhangira omundu akathandayira okwa maghetse mububaha. Aliwe Yesu mwababwira athi: ‘Ningye. Simubahe.’

Petero mwabugha athi: ‘Mukama, wamabya kwenene in’iwe, nyihamule ngase eyo wuli.’ Yesu mwabwira Petero athi: ‘Asa.’ Neryo ekihunga kyabere kinamuhitha, Petero mwalhua omwa bwathu neryo amathandayira okwa maghetse erilholha eyiri Yesu. Aliwe abere akayahika hakuhi na Yesu, Petero mwasamalira ekihunga neryo mubaha. Mwayowa iniali okw’ithobera. Petero mwabirikira athi: ‘Mukama, nyilhamaye!’ Yesu mwahamba ebyalha biwe, n’eribugha athi: ‘Busana naki wulyathika-thika? Erikirirya lyawu liri hayi?’

Yesu na Petero mubasambira oko bwathu, neryo aho n’aho, ekihunga mukyaleka. Wukalengekanaya abakwenda mubayowa bathi? Mubabugha bathi: “Kwenene wuli Mughalha wa Nyamuhanga.”

Oyu si w’omughulhu musa owa Yesu asondolera mw’emibere y’obuthuku. Ekindi kiro, omughulhu Yesu n’abakwenda biwe babya bakaghenda omo bwathu okwa musirya w’engetse, Yesu mwaghotsera enyuma omo bwathu. Abere anaghotsere, ekihunga kinene mukyahitha. Ebisunda mubyingira omo bwathu, neryo obwathu mubusulha mw’amaghetse. Abakwenda mubabukya Yesu n’eribirikira bathi: ‘Mukangirirya, thukaholha! Thuwathikaye!’ Yesu mwabuka n’eribugha n’engetse athi: “Huna!” Aho n’aho, ekihunga n’engetse mubyahuna. Yesu mwabulya abakwenda athi: ‘Erikirirya lyenyu liri hayi?’ Mubabwirana bathi: “Ekihunga n’engetse bikamukenga.” Abakwenda mubakiminya ngoku babya ibanayikethere Yesu ya ndeke, sikyendi yithaghisya ibo eryubaha ekindu kyosi-kyosi.

“Namikirirya ko nasyalhangira obubuya bw’Omwami Mukulhu, omo kihugho ky’abaliho.”—Esyonyimbo 27:13