Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Amasomo Agho Wang’igha Okwa by’Omwa Biblia

 ERISOMO 79

Yesu Akakolha Ebithiko-thiko Bingyi

Yesu Akakolha Ebithiko-thiko Bingyi

Yesu mwasa okwa kihugho erithulhughania engulhu yuwene y’Obwami bwa Nyamuhanga. Erikangania ebya Yesu akendisyakolha ng’Omwami, Yehova mwamuha omulimu abuyirire erikolha ebithiko-thiko. Mwalhamya obuli ndwalha. Ehosi-hosi eyo aya, abalhwere mubamukwamayo, erimusaba obuwathikya, kandi abosi mwabalhamya. Esyondime-thime musyalhangira, abatsiha mubowa, ebirema mubyaghenda, n’abali kw’esyombinga musyabalhuako. N’abakwama kya thulha okwa musike w’olhukimba lhwa Yesu mubalhamibwa. Abandu mubakwama Yesu ehosi-hosi eyo aya. N’omughulhu Yesu aby’anzire eribya iyuwene, mwathathoka erisubulya abandu.

Kiro kighuma, abandu mubaletha omulhume oyusanyarere omwa nyumba eyo Yesu abyamu. Aliwe enyumba yabya mw’abandu banene indi mubathabana n’ah’erilhaba. Neryo mubathobolha ekyuna omwa lhuthwe lhw’enyumba, bamalhabya mw’omulhume oyo erihika oku Yesu. Neryo Yesu mwabwira omulhume athi: ‘Hangana wughende.’ Omulhume abere akaghenda, abandu mubasweka.

Kandi ekindi kiro, Yesu abere akahika omwa kyalu, abalhume ikumi abakwire ebihagha mubimana haali n’eribirikira bathi: ‘Yesu thuwathikaye!’ Omwa buthuku obo, abahagha sibabya batholere eryasa hakuhi n’abandi bandu. Yesu mwabwira abalhume abo athi baghende omwa hekalu, ngoku Emighambo yabya yikabugha yithi abahagha batholere ibaya omwa hekalu babirilhama. Babere bane mughenda, mubalhama.  Omughuma w’okwa bahagha abere abiriminya ngoku abirilhama, mwasuba enyuma erisyasingya Yesu n’eripipa Nyamuhanga. Okwa bahagha ikumi, omughuma musa yuwasima Yesu.

Omukali oyuwabya iniabirilhwalha habw’emyaka 12 abya isyakiwithe maha w’erilhama. Omukali mwasira enyuma sya Yesu omwa bandu banene amathulha okwa musike w’olhukimba lhwa Yesu. Aho n’aho, mwalhama. Ekyo kyabere kyabya, Yesu mwabulya athi: “Nindi wamathulha okwa ngyimba syaghe?” Omukali mwakwa buba, aliwe mwasa embere sya Yesu n’eribugha okwenene. Yesu mwamuhumulikania omw’ibugha athi: ‘Mwali waghe, wughende buholho.’

Omukulhu mughuma oyukahulhawa mwa Yairo mwasaba Yesu athi: ‘Asa omwa nyumba yaghe! Mwali waghe alhwere kutsibu.’ Aliwe omusika mwaholha, Yesu isyali ahikayo. Yesu abere ahika omwa nyumba, mwasangana abandu banene ibane mulira. Yesu mwababwira athi: ‘Muleke eririra, aghotsere buyira.’ Neryo mwahamba okwa byalha by’omusika n’eribugha athi: “Mwana-mutho hangana!” Mwahangana neryo Yesu mwabwira ababuthi biwe athi bamuhe eky’erirya. Thalengekania ababuthi biwe nga mubayowa bathi!

“Nyamuhanga mwamuthulira omulimu abuyirire n’obuthoki, Yesu mwalendera ehosi akakolha ebibuya, n’erilhamya abosi abanubibawa na Sitani, kusangwa Nyamuhanga abya haghuma nayu.”​—Emibiri 10:38