Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Amasomo Agho Wang’igha Okwa by’Omwa Biblia

 ERISOMO 80

Yesu Akasombolha Abakwenda Ikumi na Babiri

Yesu Akasombolha Abakwenda Ikumi na Babiri

Yesu abere abirighunza mwaka mughuma n’embindi iniane muthulira, abya awithe ekindu kikulhu eky’erithwamu. Ni bahi abo angasombwere erikolha nayu kutsibu? Ni bahi abo angathendekire erisondolha ekithunga ky’Ekikristayo? Erithoka erithwamu ndeke okwa myatsi eyi, Yesu abya akayithagha obusondoli bwa Yehova. Neryo mwaghenda okwa kithwe kw’eyuwene, mwasaba ekiro kyosi. Engyakya, Yesu mwahindania abandi bigha biwe neryo mwasombolha mwa bakwenda 12. Ni bahi abawuk’ibuka? Amena wabu babya Petero, Anderea, Yakobo, Yoane, Filipo, Bartolomayo, Toma, Matayo, Yakobo mughalha wa Alufayo, Tadeo, Simoni, na Yuda Iskariota.

Anderea, Petero, Filipo, Yakobo

Abakwenda 12 ibakaghenda haghuma nayu. Abere abiribathendeka, mwabathuma eriyathulira ibobene. Yehova mwabaha obuthoki obw’erihigha esyombinga n’erilhamya abalhwere.

Yoane, Matayo, Bartolomayo, Toma

 Yesu mwahulha abakwenda 12 mwa banywani biwe kandi mwa bayikethera. Abafarisayo mubalengekania bathi abakwenda sibabya basomire kandi bathi ni bandu ba buli kiro. Aliwe Yesu mwabathendeka erikolha omubiiri. Bangabere na Yesu omwa mighulhu eyikalire, ng’omughulhu abya isyali aholha kandi n’enyuma w’erilhubuka. Nga Yesu, abangyi b’okw’Ikumi na Babiri balhua e Galilaya. Abandi babya bathahirye.

Yakobo mughalha wa Alufayo, Yuda Iskariota, Tadeo, Simoni

Abakwenda babya balhume abathahikene, nabu ibakasobaya. Okwa bundi buthuku ibakanabugha isibathatsuka erilengekania kandi ibathwamu nabi. Okwa bundi buthuku isibali ghumisirizaya. Nibya mubanakuba obuhaka oko yukendibya mukulhu nga nindi. Aliwe babya bandu babuya ababya banzire Yehova. Bangabere musingyi w’ekithunga ky’Ekikristayo enyuma wa Yesu erisuba elhubulha.

“Nabiribahulha mwa banywani baghe, kusangwa nabiribaminyisya emyatsi yosi eyo ngowa oku Thatha waghe.”​—Yoane 15:15