Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Amasomo Agho Wang’igha Okwa by’Omwa Biblia

 ERISOMO 77

Omukali Okwa Kithehero

Omukali Okwa Kithehero

Habere halhaba buthuku Ekiro Kikulhu ky’Erikyuruka kyalihwere, Yesu n’abigha biwe mubalhaba e Samaria bakasuba e Galilaya. Hakuhi n’omuyi we Sukari, Yesu mwimana aho bakahulha mwa ekithehero kya Yakobo. Abere anemulhuhukiraho, abigha biwe mubaghenda omwa tawuni eriyaghulha ebyalya.

Omukali mwasyatheha amaghetse. Yesu mwabugha nayu athi: “Umba aw’eripulya.” Omukali mwabugha athi: ‘Busana naki wukakanaya naghe? Ingye indi Musamaria. Abayuda sibali kanaya n’Abasamaria.’ Yesu mwabugha nayu athi: ‘Kumbe wasi nga ngali ndi, wanganzabire amaghetse w’erinywa kandi nangakuhere amaghetse w’engebe.’ Omukali mwamubulya athi: ‘Wukamanyisayaki? Siwuwithe n’eky’erithehamo.’ Yesu mwabugha athi: ‘Oyukanywa okwa maghetse awangamuha syendi syasakwa enyotha.’ Omukali mwabugha athi: “Mukama, wumbe okwa maghetse ayo.”

Neryo Yesu mwamubwira athi: ‘Wase na mwira wawu okwa kithehero.’ Omukali mwabugha athi: ‘Singwithe mulhume.’ Yesu mwabugha athi: ‘Wukabugha okwenene. Wabirithahibwa mirundi ithano, na lino wuli n’oyuthe mwira wawu.’ Omukali mwabugha athi: ‘Namalhangira wuli muminyereri. Abandu banene bikirirye bathi thwangana ramirya Nyamuhanga okwa kithwe eki, aliwe Abayuda bakabugha bathi e Yerusalemu hasa. Ngikiriraya nyithi omughulhu Masiya akendi syasa, akendisya thukangirirya ngoku thwanga ramya.’ Neryo Yesu mwabugha ekindu ekyo athali athabwira owundi mundu wosi-wosi athi: ‘N’ingye Masiya.’

Omukali mwathibitha omwa muyi n’eribwira Abasamaria athi:  ‘Nabiribana Masiya. Masiya anasi ebyosi ebinyihambireko. Mwase mumulebaye!’ Mubakwama omukali okwa kithehero n’erisyahulikirira Yesu akakangirirya.

Abasamaria mubakokya Yesu bathi abye omwa tawuni yabu. Ahabw’ebiro bibiri, mwabya iniane mukangirirya eyo, kandi abandu bangyi mubamwikirirya. Abandu mubabwira omukali Omusamaria bathi: ‘Ebya thwamabiriowa, thwamabiriminya ngoku kwenene ni mulhamya w’ekihugho.’

“Mwase! N’oyukwire enyotha ase; n’oyowanzire imaye amaghetse w’engebe butsira erighulha.”​—Eribisulirwa 22:17