Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Amasomo Agho Wang’igha Okwa by’Omwa Biblia

 ERISOMO 81

Erikangirirya ly’Okwa Kithwe

Erikangirirya ly’Okwa Kithwe

Yesu abere abirisombolha abakwenda 12, mwasa okwa kithwe aho abandu bangyi babya ibabiriyihindania. Babya ibakalhua e Galilaya, Yudea, Tiro, Sidoni, Suria, ne Yorodani. Mubaletha abalhwere n’abandi ababya kw’esyombinga. Yesu mwalhamya abosi. Neryo Yesu mwikalha okwa kithwe, amatsuka erikania. Mwasoborera ekya thutholere erikolha thwamabya thwanzire eribya banywani ba Nyamuhanga. Thutholere ithwakiminya ku thukayithagha Yehova kandi ku thutholere ithwamwanza. Aliwe sithwanga thoka erianza Nyamuhanga thwamabya isithwanzire abandi bandu. Thutholere ithwabya b’olhukeri kandi bolho okwa buli mundu, nibya n’okwa syonzighu syethu.

Yesu mwabugha athi: ‘Sikirighunza erianza abanywani bawu basa. Wutholere iwanza n’esyonzighu syawu n’erighanyira abandu erilhua okwa muthima. Omundu amakuhithania, ghenda eyo ali n’erimusaba ekighanyiro. Thwalha abandi ngoku wanzire nabu ibakuthwalha.’

 Kandi Yesu mwaha abandu b’amenge awuwene awahambire okwa bindu. Mwabugha athi: ‘Ni kikulhu kutsibu eribya munywani wa Yehova kwilhaba eribya n’esyosente nene. Omwibi anganiba esyosente syawu, aliwe sihali oyuwangiba obunywani bwawu na Yehova. Wuleke eribya n’amaghaniryo busana n’eky’erirya, erinywa, kutse eriambalha. Samalira ebinyonyi. Nyamuhanga akalhangira athi bikabana eby’erirya ebikaghunza. Eribya n’amaghaniryo sikyendi leka wuk’ongera okwa biro byawu. Wibuke, Yehova anasi ebya wukayithagha.’

Abandu bangyi aba babya isibali bath’owa oyukakanaya ngoku Yesu akanaya. Abakangirirya babu b’edini, ni bugha ambu Abafarisayo n’Abakangirirya b’emighambo, babya isibali bathabakangirirya emyatsi eyo. Ni kyahi ekyaleka Yesu iniabya mukangirirya mukulhu? Kundi ebyosi akangiriraya byalhua oku Yehova.

“Mwimaye engomo yaghe, muhekeyo, mwighire okw’ingye, kusangwa indi mwolho-mwolho, n’ow’omuthima ahehere, nenyu mwasyabana erilhuhuka omo mithima yenyu.”​—Matayo 11:29