Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Amasomo Agho Wang’igha Okwa by’Omwa Biblia

 ERISOMO 68

Elizabeti Akabana Omwana

Elizabeti Akabana Omwana

Enyuma w’emyaka 400, esyombimbo sye Yerusalemu syali himbirwe, omuhereri Zekaria na mukali wiwe Elizabeti, babya bikere hakuhi ne Yerusalemu. Babya ibamabirighunza myaka mingyi omwa butheke isibawithe mwana. Kiro kighuma Zekaria iniane muha obuhere omwa hekalu eyibuyirire, malaika Gabrieli mwamuhikako. Zekaria mwakwa obuba, aliwe Gabrieli mwamubwira athi: ‘Siwubahe. Namakulethera mwatsi mubuya erilhua oku Yehova. Mukali wawu, Elizabeti, akendi butha omwana kandi erina liwe likendi syabya Yoane. Yehova abirisombolha Yoane busana n’omubiiri w’embaghane.’ Zekaria mwamubulya athi: ‘Nanga ligha indi ebya wukabugha? Ingye na mukali waghe thwabirikulha kutsibu okw’ibutha omwana.’ Gabrieli mwabugha athi: ‘Nyamuhanga yulyanyithuma erikubwira omwatsi oyu. Neryo kundi muwuthaligha ebya ngabugha, wukendibya mumu erihika aho mwana akendi syabuthirwa.’

Zekaria lero mwaghunza omwa hekalu mwa buthuku bunene. Neryo abere asalha alhuamu, abandu babya ibana lindirire eyihya eriminya ekyamubereko. Zekaria abya isyakibugha. Iniakakolesaya esyosayini nyisa-nyisa. Neryo abandu mubaminya ngoku Zekaria abirihebwa omwatsi erilhua oku Nyamuhanga.

Enyuma waho, Elizabeti mwabya mukule n’eributha omwana w’obulhume, ngoku omumalaika anabugha. Abanywani n’abahughu biwe mubasyalebya omwana. Mubatsema nayu. Elizabeti mwabugha athi: ‘Erina ly’omwana n’iyo Yoane.’ Mubabugha bathi: ‘Omw’eka yawu simuli oyukahulhawa mwa Yoane. Mulhuke mwa Zekaria, erina lya thatha wiwe.’ Neryo Zekaria mwahandika erina eryo athi: ‘Erina ly’omwana n’iyo Yoane.’ Okwa ndambi eyo, Zekaria mwatsuka eribugha! Omwatsi w’eributhwa ly’omwana musulha omwa Yudea, n’abandu mubasweka bathi: ‘Omwana oyu asyabya athi?’

Zekaria musulibwa n’omulimu abuyirire. Mwaminyerera athi: ‘Leka Yehova apipawe. Mwalhaghanisya Abrahamu  athi akendi syathuma omulhamya, Masiya, erisyathusabulha. Yoane akendisyabya muminyereri kandi asyuwania enzira busana na Masiya.’

Kandi ekindu ky’embaghane mukyahika okwa muhughu wa Elizabeti, iya Maria. Leka thukilebaye omwa sura eyikakwamako.

“Oko bandu eki sikyanga thokekana, nikwa oku Nyamuhanga emyatsi yosi yikathokekana.”​—Matayo 19:26