Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Amasomo Agho Wang’igha Okwa by’Omwa Biblia

 ERISOMO 69

Gabrieli Akabungira Maria

Gabrieli Akabungira Maria

Elizabeti aby’awithe omuhughu wiwe mulere iya Maria, oyuwabya ikere omwa muyi we Nazareti e Galilaya. Maria abya iniabiriyasungwa na Yozefu, omubatsi w’esyombaho. Elizabeti abere akaghunza mezi mukagha iniane mukule, malaika Gabrieli mwahika oku Maria. Mwabugha athi: ‘Wabukire, Maria. Yehova abirikutsumulha.’ Maria mwathayitheghererya ebya malaika amanyisaya. Neryo omumalaika mwamubwira athi: ‘Wukendibya mukule iwabutha omwana w’obulhume n’erina liwe likendi syabya Yesu. Akendi syathabalha ng’Omwami. Obwami biwe bukendi syabyaho kera na kera.’

Maria mwabugha athi: ‘Sindi nathabana mulhume. Nanga butha nyithi omwana?’ Gabrieli mwabugha athi: ‘Sihali ekikalema Yehova. Omulimu abuyirire akendi syakuhikako, neryo wukendi syabutha omwana. N’omuhughu wawu iya Elizabeti, omwa bukekulhu bwiwe, abiribya mukule.’ Neryo Maria mwabugha athi: ‘Ingye ngali mughombe wa Yehova. Kinyibyeko ngoku wabiribugha.’

 Maria mwaya omwa muyi oyo owabya omwa hithwe eriyalebya Elizabeti. Maria abere akamuramukya, Elizabeti mwowa omwana akasathya omo nda yiwe. Inian’oswire n’omulimu abuyirire, Elizabeti mwabugha athi: ‘Maria, Yehova abirikutsumulha. Ni kitsumbi eribya na mama w’Omukama waghe omwa nyumba yaghe.’ Maria mwabugha athi: ‘Ngapipa Yehova n’omuthima waghe wosi.’ Maria mwikalha na Elizabeti ahabw’amezi asathu, neryo mwasuba e Nazareti.

Yozefu abere akaminya Maria ku ni mukule, mwanza erimughana. Aliwe omumalaika mwamuhikako omwa nzoli athi: ‘Siwusaghe erithahya Maria. Syathakolha kibi.’ Neryo Yozefu mwaherukya Maria amamuletha ewiwe.

“Yehova akakolha ebyo anzire omo lhubulha n’okwa kihugho.”​—Esyonyimbo 135:6